Agriculture Produce Wholesale Market sa dawn

Mizoram sawrkar chuan kuthnathawktute tharchhuah thlai thar hralhna turin Agriculture Produce Wholesale Market chu Aizawl khawtchhuah hmun li-ah sak tumin hma a la mek.

Agriculture Minister PC. Vanlalruata leh Enviroment, Forest & Climate Change Ministe Lalthansanga te chuan Inrinni khan Sihphir Venghlun, Phunchawng, Falkawn leh Melthum-a ‘Agriculture Produce Wholesale Market’ sak theihna hmun hi enin heng hmun an enna ah hian Minister Lalthansanga chuan Aizawl dai vel mai ni lo, Zokhaw lama kuthnathawka eizawng tam tak ten thlai thar hralh chungchang ah harsatna an tawk nasa thin hle tih sawiin, Mizoram chhunga thlai tharte pawh Wholesale Market neih a nih chuan a hralhna kawngah hmasawnna a awm phah ngei a beisei tih a sawi a. Agriculture Minister PC. Vanlalruata pawhin Wholesale Market chu sak theih a nih chuan thlai thar vawnthatna tur, Cold Storage leh kuthnathawktute hahchawlhna te bakah Market Building chhungah ATM Booth te dah tum a nih thu a sawi a, heng hian kuthnathawktute tan malsawmna thar a thlen theih ngei a beisei tih a sawi ve bawk.

Agriculture Produce Wholesale Market hi RKVY Scheme atanga sak tur niin Mizoram chhunga thlai thar te hralh nan Aizawl kawtchhuah hmun 4-ah sak a ni dawn a, Aizawl North leh South te chu hmalakna hmasa ah hman an ni dawn a ni.