Kawng chhia avanga Mizoram-a harsatna thleng Chief Minister hovin sawiho a ni

Chief Minister Lalduhoma chuan nimin khan Mizoram Commercial Vehicle Union hruaitute kawmin tunlai-a kawng chhia avanga Mizoram-a harsatna thleng chungchang a sawipui a. Kawng chhiat vanga tuna Sumo Service te an chawlhna zawng lung hnawhin liethei tlan theiha a rang lama siam tum a ni.

Nimin-a Chief Minister Office-a Mizoram Commercial Vehicle Union hruaitute nen an inkawmna ah hian Chief Minister chuan kuminah India ramin ruahtui kan dawng tha tih sawiin, “Tuilian leh leimin a tam a. Chhiatna pawh kan tawk nasain kawngpui thenfel nan pawh hian sum leh pai a kal tam hle. Hei hi kan tum anga hma kan lak chak theih loh chhan ber a ni,” a ti a. Ruahtui vanga an harsatna te lo hriatthiamsaka lo ngaichang hram hram turin a ngen a. Sawrkar hmalak dan te sawiin, Kawnpui leh Khamrang inkar chu remchang hmasa berah amah ngeiin tlawh a tum thu a sawi bawk a ni. Chief Minister chuan tuna Mizoram chak lakna kawngpui chhe zual lai, Kawnpui leh Khamrang inkar chu Satguru te thawh a ni tih sawiin, “Maintenance Period-ah a lut mek a, May 2026 thleng awh tur a ni. An Maintenance Period a nih miau avangin NHIDCL in a laksak duh si lova, tun hi a thleng ta a ni,” a ti a. Sawrkarin an contract tihtawpsakin an Maintenance Fund awm ang ang chu nimin khan Mizoram PWD Account-ah a luh beisei a nih thu pawh Chief Minister chuan sawiin, “Chung sum te leh State sum te nen chak taka umzui a ni. Hnathawktu hi hlawm thumah dah an ni a, Vawiin-ah pawh lung trip 20 an thlen hman ang,” a ti.

Kawng chhiat vanga tuna Sumo Service te an chawlhna zawng zawng chu Lung hnawha tlan theiha a rang lama siam tura an ngenna chu a theih chen chen bawhzui nghal a ni dawn tih Chief Minister chuan sawiin, Kawng chhia vanga Sumo Service chawlhna te a rang lama inhrilhhriat ni se, an ti a. Manipur chak lakluhna Kawlkulh leh Hliappui inkar kawng chu sawrkar chuan PMGSY-3 hnuaiah siam thar vek turin Contractor thar kutah a hlan tawh thu leh tuna lung hnawh nghal ngai leh lirthei tang nawrchhuaktu tur JCB pawh Contractor hnena ngen tha an ti tlang bawk.

Commercial Vehicle Union hruaitute hian kawngpui tha tawk lo vanga harsatna an tawh thu bakah tuialhthei man sang chungchang te, lirthei kaihhnawih chhiah chungchang te, Fitness Test thu leh State dang atanga Private car hmanga rinhlelhawm taka rawn vak vel an tam thu leh a ngaihpawimawh thil dang te an thlen a. Heng thil hrang hrangte bawhzui dan tur pawh hi an sawiho a. Chief Minister hi PWD leh Transport changtu Minister Vanlalhlana leh Adviser to Chief Minister (Finance) TBC. Lalvenchhunga leh PWD Official pawimawhten an tawiawm a ni.