Handholding Scheme thalaite theihna chawikanga, thawkchhuaktu ni tura buatsaihna Scheme a ni - CM

Chief Minister Lalduhoma chuan Handholding Scheme chu thalaite theihna chawikanga, thawkchhuaktu ni tura buatsaihna Scheme a ni tih a sawi.

Mizoram Youth Commission (MYC), Honda India Foundation leh Honda CSR Implementing Agency Visan Foundation te tangkawpin an buatsaih Hotel Management Training hawnna hun nimin-a MYC Hall, MINECO Aizawl-a neih ah Chief Minister Lalduhoma chuan Mizo thalaite chu theihna nasa tak nei, training leh inbuatsaihna tha zawk siamsaka State pawn leh ram pawna hna tha tak tak thawk thei an ni tih an hriat thu sawiin, “Thalaite theihna haichhuah a, kan ram economy chawikangtu atana buatsaih hi kan sawrkar thiltum lian pakhat a ni,” a ti a. Hei vang hian Handholding Scheme pawh Vawiin hian an hawng dawn tih sawiin, “Thalaite theihna chawikanga, thawkchhuaktu ni tura buatsaihna Scheme a ni,” a ti.

Chief Minister Lalduhoma chuan he training neih a nih theihna tura sum leh pai tumtu Honda India Foundation leh Visan Foundation te chungah lawmthu sawiin, he Training pawh hi Hotel Management lama tui kan thalai fel tak tak 39 ten an chhawr dawn tih sawiin, tha taka inzir a, Hotel liana thawk tlaka an in chher puitlin ngei an beisei thu a sawi a. “Nangmahni a awm theihna kha ringhlel reng reng suh ang che u, in hlawhtlinna hi kan ram hlawhtlinna a ni. Mizoram hlawhtlinna hi mi pakhatah emaw, mi thenkhatah emaw a innghat lova, kan zaa kan tanrualna leh thawhrah ah zawk a innghat a ni,” a ti bawk.

He hunah hian MYC Chairman Malsawmzuala Ralte pawhin tunhnaia MYC in thalaite tana hma an lakna langsar zual te a tarlang a. Group A leh B Coaching chu District pathumah an kalpui mek thu leh UPSC Prelims tling mi 2 an tanpui thu te, British Army-a luh dilna 240 an thehluhsak tawh thu leh an zinga hmeichhe pakhat chuan kohna a dawn thu a sawi a. Mandarin zir turin Mizo nula pahnih Taiwan-ah an tirh mek thu leh anni hian thalai tam zawk te an zirtir leh ang tih a sawi a. NSDC te nena tangho in Japan rama hna thawk tura thalaite tirh an tum mek thu te pawh a sawi bawk.

Hotel Management Training hi thla hnih chhung awh tura ruahman a ni a, Stage pasarih a awm dawn a, chumi hnuah Assessment a awm leh ang a. Chumi paltlang te chuan India rama Hotel changkang ber berah hna an thawk zui thei dawn a ni. Nimin-a he hun hman ah hian Honda India Foundation-a CSR Head, Satyaprakash Patil leh Sangeeta Ranjit, Managing Trustee, Honda India Foundation CSR Initiatives te pawhin thu an sawi bawk a ni.