NHIDCL in Mizoram-a kawngpui an siam mek te dinhmun Central YMA in an sawipui

Mizoram-a kawngpui hrang hrang siam hna thawk mektu NHIDCL-a Executive Director Virender Kumar Jakhar-a Pisa-ah nimin khan Central YMA hruaitute chu lengin Mizoram chhunga NHIDCL hnuaia kawngpui laih mek leh harsatna awm te an sawiho.

Central YMA hruaitute hian Sub-Hqrs. YMA hrang hrang hruaituten an huamchhung theuhva NHIDCL hnuaia kawng laih meka harsatna awm an sawi te NHIDCL hotute hi sawipuiin, Aizawl - Tuipang Road-a Khumtung leh Serchhip inkara kawng siam tha lo leh Side Drain siam tha lo te sawipui a ni a; Lunglei leh Tlabung inkar kawng siam mek chak zawka hma la tur te; Saitual-Saichal Road ( NH.102 B Diversion) a leivung paih fimkhur loh avanga harsatna awm te, leivung paihna tur (Spoil bank)-ah chauh leivung paih tur te, Kawnpui - Kolasib inkara NHIDCL enkawl kawng siamthat chungchang te leh hmun hrang hranga kawngpui laih mek chungchang te an sawipui a ni.

NHIDCL Executive Director Virender Jakhar chuan Mizoram-a an kawngpui laih mek chungchang leh dinhmun te Central YMA hruaitute hi a lo hrilhfiah a. Spoil Bank ni lo a leivung paih awm te chu enfiah a hmalak zui a tum thu sawiin, Lunglei leh Tlabung inkar kawngpui chu kumin December-ah chuan zawh deuh vek a nih tawh tur thu te a sawi a. Saitual leh Saichal inkar kawng leh hmun danga an hmalakna te pawh a dinhmun sawiin, Central YMA puihbawmna a ngen nghal bawk.

Central YMA hruaitute chuan Mizoram in kawngpui tha kan neihna tura hnathawh kal mek chu tluang taka a kal zel theihnan Contractor te pawh puih an inhuam thu an sawi a, chutih rualin dan ang thlapa hnathawh a nih theihna tur te, tha tak leh tlo ngei tura hnathawk turte leh leivung paihna turte pawh a paihna tur ngei ah paih a nih zel theihnan NHIDCL hotuten Contractor te hnathawh enpui zel turin an chah bawk. 

NHIDCL Regional Office, Aizawl-a an inkawmna ah hian Central YMA hruaitute hi an President Lalhmachhuana chuan hovin General Secretary Prof. Malsawmliana; Assistant Secretary Fabian Lalfakawma; Finance Secretary MS. Ralte leh SF. David Ngursangzuala CEC te an tel a ni.