Interview tura koh ten Interview-na tur an thlen hnua hna lak cancel MZP in hriatthiam harsa an ti

Mizo Zirlai Pawl chuan Commerce & Industries Department (Commerce Wing) hnuaia Assistant Marketing Inspector post khat lak tura Interview tura koh ten Interview-na hmun tur an thlen hnua hna lak cancel a ni thut chu hriatthiam harsa an tih thu sawiin, a mawhphurtu chu hrem ngei an phut thu an sawi bawk.

Nimin-a thuchhuah an siamah Mizo Zirlai Pawl (MZP) General Hqrs. chuan tunhnaia Commerce & Industries Department (Commerce Wing) hnuaia Assistant Marketing Inspector post khat (1) lak tur, Exam pawh conduct vek tawh hnua Interview tura koh ten Interview-na hmun tur an thlen vek tawh hnua hna lak an Cancel thut chu mak an tih thu leh hriatthiam har an tih thu sawiin, Thalai hna zawng mekte zahlohna lian takah an ngaih thu an sawi a. He hna lakna tur atan hian October 6, 2023 khan Advertisement tihchhuah a nih thu sawiin, Written Exam hi July ni 19, 2024 khan neih niin Written Exam beitu atangin mi 10-te chu September 10, 2024 zing dar 10:00-khan Commerce & Industries Secretary Room-ah Personal Interview tura koh an ni tih an sawi a. Interview tura kal ten anmahni koh hun an nghah mek laiin hna lak hi cancel an nih thu leh Application Fee an laklet theih thu hrilh an nih thu sawiin, thalai hna zawng mekte ti hnual thei zawng leh ti beidawng thei tur thil a thleng ta mai chu an ngaih thutak thu leh thil thlen dan uluk taka chhui chiang a, a tisualtu lakah hremna lek ngei turin sawrkar chu an ngen bawk a ni.

MZP chuan thalai hna zawng mekte inbuatsaihna ti thlawn tu leh rilru na taka siamtu hi hrem ngei an phut thu sawiin, Department pawh hetiang thil lian tak an tihsual avangin ngaihdam dila, sawifiah tura an phut thu an sawi bawk a. Tun hnuah hetiang thil dik lo a awm a nih chuan MZP inrawlh ngai lova, rang taka chingfel turin sawrkar an ngen thu an sawi bawk a ni.

MZP chuan tunhnaia Mizoram sawrkar hnuaia hna hrang hrang lakah dik leh felfai taka hnalak kalpui turin Sawrkar Department hrang hrangte an ngen nawn leh tih pawh sawiin, sawi neuh neuh awmte pawh a tul angin chhuizui an tum thu an sawi a. Mizoram sawrkar pawh hetiang thil dik lo ti thinte enzui tur leh thalai hna zawng mekte ti beidawngtu na taka hrem turin a ngen nawn tih an sawi a. Puanzar a, na taka innawr hmaa Zirlaite leh thalaite hmakhua ngai hram tura an ngen thu pawh an sawi a ni.