Hnamdang Nupui/Pasal nei lo tura inzirtirna Ni hmang

Mizo Zirlai Pawl (MZP) chuan kumdang-a an lo tih tawh thin angin nimin, September 2, 2024 khan ‘Hnam dang Nupui/Pasal nei lo tura inzirtirna Ni’ chu hmun hrang hrangah hmangin Mizo Zirlaite tan hnamdang nupui/pasal nei lo tura inzirtirna atan he ni hi hman a ni.

Hnamdang nupui/pasal neilo tura inzirtirna ni-ah hian MZP hruaitute chuan School hrang hrang tlawhin, Mizo zirlaite chu hnamdang nupui pasal nei lo tura fuihin, hnamdang nupui/pasal neih pawi zia an hrilh a. “Mizote chu kan chhehvel hnamdangte nen tehkhin chuan hnam tlemte kan ni a. Kan hnam hi humhalh a ngai takzet a. Chimralna laka kan hnam humhalhna turin hnamdang nupui pasalah i nei lo ang u,” an ti. Mizo ten chimral kan hlauh loh hun chu kan ral hun tur a ni tih MZP hruaitute chuan sawiin, Mizo hnam Dan-in Mizo hmeichhia hnamdang pasal nei chu an fate Mizo an nih theih loh dan leh Tribal ni lo pasal an neih phei chuan an fate’n Tribal-te hamthatna dawn tur ang an dawn ve theih loh thute an sawi bawk.

Hnamdang nupui/pasal nei lo tura inzirtirna hun hi MZP chuan kum 2015 atang khan kumtin September ni 2-ah Mizoram hmun hrang hrangah an hmang thin a, he ni an hman hi Mizo Zirlai ten an hlut hle nia sawiin, hnamdang nupui/pasal nei lo tura inzirtirna hun tha tak siamsaktu School hrang hrang thuneitute chungah thinlung takin lawmthu an sawi tih an sawi bawk.