School kai ip (bag) rit chungchang sawiho a ni

School naupangte School kai ip (bag) rit lutuk avanga zirlaite'n harsatna an tawh loh nana hmalak dan tur chu nimin khan Lunglei-ah sawiho a ni.

He sawihona Lunglei DC Conference Hall-a neih hi District Bawrhsap R. Lalthazuala chuan kaihruaiin Mizoram sawrkarin April ni 30, 2021-ah School naupang bag rit lutuk chhawk zangkhaina tur inkaihhruaina a lo chhuah tawh thu leh Lunglei District-ah pawh a theih chin chinah bawhzui a nih rualin, tun dinhmunah engtia kalpui nge tha ang tih ngaihtuah turin inrawnkhawm chu buatsaih a nih thu a sawia. Naupangte chu zirna tha pek ngawr ngawr piah lamah, an School kai ip rit lutukin an hriselna a nghawng thei em tih te pawh ngaihtuah a, naupangte tanghma atan ruahmanna siam a pawimawh thu a sawi bawk.

He hunah hian School kai Ip rit lutuk nena ni tina School kal thin naupangte hriselnain a tuar theih dan tarlan niin, zangkhai zawka kalpui a nih theih dan tur sawiho a ni a. He harsatna sukiang tur hian School Education Department-in April ni 30, 2021-a thu a lo chhuah tawh chu District Education Officer-in Government leh Private School zawng zawngah Mizo tawngin thawnchhuak se an ti a. School tinah lekhabu dahna (bookshelf) neih theih dan tur ruahman ni se tih a nih bakah, School-a zir hunbi (routine) mila lehkhabu thlak lova lekhabu zawng zawng ken vek chuan bag a tih rih zual avangin routine anga lehkhabu ken turte chu nu leh pate'n enpui bakah, Zirtirtute'n an Subject mamawh chauh keng tura hrilh hriat ni se tih a ni.

Sawrkar inkaihhruaina angin ni khatah Class I leh II tan Subject 3, Class III atanga V tan Subject 4, Class VI atanga X tan Subject 6 angin kalpui ni se; Homework pek chungchangah ni tin Primary School-ah Subject 1, Middle School-ah subject 2 leh High School leh Higher Secondary School-ah Subject 3 aia tam pek loh ni se tih a ni bawk.