Fur laia khawngchhe siam a harsat thu leh mipuite pawhin hrethiam se a duh thu PWD Minister in a sawi

PWD changtu Minister Vanlalhlana chuan Fur laia khawngchhe siam a harsat thu sawiin, mipuite pawhin hrethiam se a duh thu a sawi.

ZPM Party in nimin-a Party Chhung Inkhawm an neih ah PWD changtu Minister Vanlalhlana chuan PWD changtu Minister a nih angin tunlaia kawngchhiat zia leh siam that a tul zia a hrechiang hle tih a sawi a, “Department hotute nen ngaihtuahna sengin ruahmanna pawh kan siam a ni. Sawrkar hmasa hunlaia kawng siam a ni a, Fur khat daih tura kan beisei laiin a daih ta si lova, Fur lai a ni a, rem leh rem lo chung pawha kawngchhe siam hna kan thawk chung pawhin a tuk lawkah Fur ruahtuiin min tihchhiat sak leh mai thin a ni. Khaw awmdan hian a zir miau si loh avangin mipuite pawhin min hriat thiam ka beisei a ni,” a ti. Mizoram kawng chu PWD in a enkawl vek lo tih pawh Minister chuan sawiin, “Public Sector NHIDCL hian Mizoram kawng tam tak hi an enkawl mek a, kawng thenkhat pawh BRTF ten an enkawl mek bawk a ni, kawng chhe siam that kawngah beisei anga an chet chak thin loh avangin PWD hian hma a lak khalh lo thei thin lo a, mipui tan harsatna a thlen kan hlauh thin avangin PWD hi kan che chhuak vat thin zawk a ni,” a ti.

Two Wheeler Taxi Permit chungchang pawh sawiin Transport changtu ni bawk Vanlalbhlana chuan “Sawrkar hmasa hun lai khan politics khelh nan leh mite tihlawm nan an lo hmang thin a ni awm e, keini erawh chuan Two Wheeler Taxi hi mipui mamawh aia tam a awm tawh ni a kan hriat avang leh eizawn nana hmang mekte kan tihbuai loh nan politics khelh nan hman kan tum ve lo a ni,” a ti bawk.

ZPM Ministry chuan ni 238 chauh Sawrkar nan hun la hmang mahse, Mizoram in hmelthar a hmu chho mek nia sawi bawkin, “Mizoram Chief Minister Pu Lalduhoma hi Pathian in kan ram hruai tura a bel ruat niin ka hria a, mi thenkhatten sawichhe thin mahse, a hnung kan zui chhung hian an sawichhiatna leh beihna ang hi a nunah ka la hmu ve lo,” a ti a. “Mizoram Sawrkarin huaisen takin hma a la mek a, mipui sawisel leh eptu Party te beihna pawh hmachhawn huamin Zoram siamthat hna kan thawk mek a ni. Aikal lak chungchangah pawh a hlawhtlinna kan hmu meka, kalphung hlui khan mipui rilru a lo chiah hneh tawh em em a, siam that pawh a har khawp mai. Nimahsela, harsa ti tak chung leh hrehawm ti tak chungin kan ram siamthat hna kan thawk lui mek a ni,” a ti a. Ration Card leh buhfai lak dan chungchangah pawh ring tihkhawng a tul hle tih sawiin, “Sawrkar kal tawhte pawhin an tih duh, mahse an lo tih ngam loh khawpa thil harsa a ni. Chutih laiin Kalphung thar mipui Sawrkar chuan huaisen takin hma kan la a, Ration Card siamrem chungchangah hian eptu Party lam ten mipui rilru kaihpen tumin miharsa zawkte nghawng tur ang hialin sawi thin mah se, Sawrkar hmalakna hian harsa zawkte tana phurrit siam a tum lo a ni,” a ti bawk.