Hna chawlhsan leh rih

North East Industrial Development Scheme (NEIDS) hnuaia cheng nuai 800 senna tur, Development of Village based Eco Tourism at Khamrang Project chu a bul tan chhoh mek a nih hnuah chawlhsan leh rih a ni.

Khamrang Eco-Tourism hmalakna kal mek chawlhsan a nih chungchangah hian Tourism Department chuan DPR approved tawh sa tih danglam a ngaih avang leh chumi tihfel hma chuan Funding Agency-in Fund an pek loh vanga chawlhsan a nih thu sawiin, he Project atana hnathawhna tur cheng nuai 10 an dawn bak sum an la dawn loh thu an sawi a ni.

Nikum August ni 18 khan Khamrang Eco-Tourism project hi khatih laia Tourism Minister Robert Romawia Royte chuan a hawng a, he hna thawk tura thlan Creative Minds te nena Contract Agreement Amount chu cheng nuai 780 niin nakum March-ah hna hi thawh zawh tura tih a ni a. Tun dinhmunah he Project hnuaia hnathawh tur 22% thawk zo tawh anga chhut niin Ministry of DoNER chuan kum 2022 April ni 19 khan cheng nuai 800 a santion a ni.