Lunglei Bawrhsap in tlawh

Baptist Church of Mizoram (BCM) hnuaia Mizoram Baptist Kohhran Hmeichhe Pawl (MBKHP) enkawl, Ruihhlo ngaite leh hmeichhe rahbi tleute enkawlna leh chhawmdawlna hmun Melte-a Chhawmdawlna In chu nimin khan Lunglei DC R. Lalthazuala chuan tlawhin an hmalakna a enpui a. MBKHP Chhawmdawlna In hi kum 1997-a din niin Project Manager hovin thawktu mi 25 an awm a, enkawl lai hi mi 87 (mipa 68 leh hmeichhia 19) awmin, an dinhmun azirin hunbi fel tak siama enkawl an ni a. An taksaa harsatna an hneh theih nana enkawl bikna leh anmahni kawmna leh thu tha fahna (counselling) te kalpui a nih bakah, mahni kutkawiha ding thei tura thiamthil chi hrang hrang zirtirna te kalpui a ni a. Hmeichhe tan puanthui leh La phiar zirna leh Mipa tan thing mistiri (carpentry) leh khawl thil siam (electronic wiring & repair) zirna te kalpui a ni.