Kawnpui leh Khamrang inkar kawng chhia PWD Minister hovin a hmunah enfiah a ni

National Highway (NH) 06, Kawnpui leh Khamrang inkar kawng chhia chu nimin khan PWD Minister Vanlalhlana hovin a hmunah enfiah a ni a, helai hmuna kawng chhia te chak zawka siamthat a nih theih nan lirthei tangkhang mekte chu nimin-a chhuah tir vek hman tura hmalak nghal a ni.

PWD Minister Vanlalhlana hian tunhnai ruahtui tla nasa avanga National Highway (NH) 06, Kawnpui leh Khamrang inkar kawng chhia chu nimin khan a hmunah tlawhin hmalakna kal mek a enfiah bakah Official te nen hmachhawp te leh hemi kaihhnawih lirtheia eizawngte a sawipui a. PWD Minister chuan NH-06 chu Mizoram chak lakna kawngpui pawimawh tak a nih avangin kawng chhiate hmanraw neih ang ang pawt khawma theihtawp chhuaha buaipui a nih thu a sawi a. PWD hotute chu hmalakna te uluk taka vil reng tura chahin, hemi in a nghawng hrang hrangte pawh kawngpui tha nei tura Sawrkar hmalaknate thlawp tlat turin a sawm a. Kawng chhiate a ranglama thawmthat thuai tum a nih thu sawiin, kawng siam leh thawmthat hna thawh a nih chhung hian harsatna tawk palh an awm pawhin kan zavaia tana tha tur a ni tih hriaa lo hrethiam hram hram turin a ngen a ni.

He huna thurel bawhzuiin NH-06 Khamrang leh Kawnpui inkar kawng chhiate chak zawka siamthat a nih theih nan lirthei tangkhang mekte chu nimin-a chhuah tir vek hman tura hmalak nghal a ni a. Vawiin atangin ni thum chhung lirthei eng chi mah tlan tlang tir lovin ngawrh lehzuala kawng siam hna thawh nise tih a ni a. Hemi atan hian PWD lamin tuna an hman mekte bakah kawng siamna hmanrua leh thawktu tam zawk a ngaihtuah belh nghal a. Hemi hnua harsatna a awm a nih chuan ruahmanna thar siam leh nise tih a ni. Heng bakah hian kawng siam nana pawimawh lungchang leh POL te a thlen zung zung theih dan turte, lirthei veivakte awmze nei zawka buaipui dan turte pawh sawiho a ni a. NHIDCL enkawl kawngpuia harsatna thlengte chu a tul angte bawhzui thuai tura hriattir nise tih a ni bawk.