‘Ban-a Kaih’ ah Chief Minister Special Scheme awmin ‘Chief Minister Rubber Mission’ kalpui a ni

Chief Minister Lalduhoma chuan a sawrkar Flagship Programme ‘Ban-a Kaih’ ruahmanna chu tun thla hian hawn hman an tum thu leh chutah chuan Chief Minister Special Scheme a awm dawn thu sawiin, ‘Chief Minister Rubber Mission’ pawh an kalpui tan thu a sawi bawk.

Tourism Department hnuaia Tour Operator pakhat, Evergreen Tours & Travels leh Chungtlang Lo Zawh Organising Committee chuan Inrinni khan Chungtlang Zau-ah Lo Zawh hun an buatsaih a, he hun hi Chief Minister Lalduhoma chuan hmanpuiin an Flagship Programme Handholding Scheme chu tun thla hian hawn hman an tum thu sawiin, chutah chuan Chief Minister Special Scheme a awm dawn thu leh hmalakna tur a zira cheng nuai khat thleng dawn theihna tur a nih thu a sawi a. Hei bakah hian Loan cheng nuai sawmnga (50) thleng puk theihna a awm dawn bawk thu leh chutah chuan sawrkar chu Guarantor-ah a tang anga, a thawk thate chu Loan Interest zawng zawng pawh an tumsak bawk ang tih a sawi a. “Hetiang hmalakna hi India rama kalpui thei awmchhun kan ni dawn a ni,” a ti.

Chief Minister chuan ‘Mipui sawrkar’ an nih ang ngeiin tumah thlei bik nei lovin, a ti tak tak tur an nih phawt chuan an Handholding Scheme hi an dil thei ang, tiin Mizoram hmasawnna tura sawrkar ruahmanna a sawi a. Mipuite taihmakna ram, hlawhtlin tuma bei tak tak tamna ram chu ram changkang leh hmasawn an ni zel tih sawiin, Chutiang mi te chu a tahtawlin an Ban-ah kaiin an khaichhuak dawn tih a sawi a. “Kan hlawhtlin ngei kan ring,” a ti. An sawi tawh thin angin thlai thar pali an thlan te chu a rate an puan angin sawrkar chuan Support Price a pe dawn tih pawh sawiin, “Tuten emaw sawi pawr an lo tum a nih pawhin lo awih suh u. Sawrkar chu a dinna ngaiah nghet takin a ding reng a ni,” a ti.

Chungtlang khua chu Rubber ching tam khua an nih thu pawh Chief Minister chuan sawiin, “Kalphung thar mipui sawrkar hian Rubber hi kan ngaihpawimawh avangin ‘Chief Minister Rubber Missions’ kan kalpui tan a. In khua ah hian hmalakna tam tak kan nei chho zelin a rinawm,” a ti bawk.

Chungtlang hi Mamit District, Reiek thlanga awm a ni a, chhungkaw 100 vel an cheng mek a. Eizawnna lamah Lo nei mi an la ni deuh vek a, an khaw ram tlak lama Tut lui phaiah chhungkaw 80 velin Rubber kung 50,000 chuang an nei mek a, Mizoram-a Rubber Cluster lian ber niin an insawi a, Chhungkaw 70 vel chuan an hnai tan tawh nghe nghe a ni.