Kawng chhia siamin turin sawrkar in pawisa a nei

Public Works Department (PWD) changtu Minister Vanlalhlana chuan tunlaia Mizoram kawng chhe siamna tur chu sawrkar in pawisa a nei tih a sawi.

Mizoram chhung hmun hrang hranga kawng chhe chungchang ah PWD Minister chuan kawngpuite chu siam duh mah se, ruahtui a tlâk reng avangin siam mai theih a nih loh thu a sawi a, Ruahtui a tlak loh hunah kawng siam hna an tan dawn tih sawiin, Sawrkar chuan pawisa ngah viau lo mah se, kawng chhe zual lai siamthatna tur pawisa chu an nei tih a sawi a, kawng chhe siam that hlan an nghakhlel hle tih a sawi bawk.

Ruahtui la tuihul chiah lo mah se Aizawl khawpui chhung kawng chhe zual lai siam mek a nih thu sawiin PWD Minister chuan, tunlai hian kawng khuar chhe zual laite Boulder hmanga hnawh a ni a, a tahtawla siam chhoh mek a ni tih a sawi a. Hetihlai hian Alkatra nena kawng siam chu an la ngam rih lo a, Alkatra nena kawng an siam hnu lawkah ruah a rawn sûr leh thin a, an kawng siamte a chhe leh nghal mai ze tih a sawi a. Tun ang khuaa Alkatra nena kawng siam chu sum khawhralna mai a nih avangin an duh rih loh thu a sawi bawk.

PWD Minister hian Aizawl khawpui chhung chauh ni loin, khawpui pawn kawngpuite pawh ruahtui tlak loh hunah siamthat hna thawh a ni dawn tih a sawi a, kuminah Cyclone Remal vangin kawng a chhe nasa tih sawiin, Mizoram chhungah PWD enkawl loh kawng tam tak a awm thu PWD Minister chuan sawiin, NHIDCL leh BRTF-in an enkawl mek engemaw zat a awm a, chutihrual erawh chuan Mizoram chhung a nih avangin a that theihna atan theihtawp an chhuah tih a sawi a, NHIDCL leh BRTF hotute an nawr reng thu a sawi bawk. Mizoram kawng chhia avang hian hmun hrang hrangah harsatna a thleng bawk a ni.