Aizawl-a Settlement Office then turin hma la mek

Land Revenue & Settlement Department hnuaia Aizawl-a Settlement Office chu hmun hnih ah then a nih dawn avangin tunlai hian ngawrh taka inbuatsaihna kalpui mek a ni.

Mizoram sawrkar chuan kumin July 25 khan thuchhuah siamin Aizawl Revenue District chu hmun hnih, Aizawl South leh Aizawl North-a then turin a ti a, Aizawl-ah Settlement Office pahnih a awm tawh dawn avang hian Land record leh a kaihhnawih hrang hrang te chinfel leh thliar hna hi ngawr taka thawh niin tunhma a kum tam tak a kum bi-a lo vawn tawh General Register chu Veng leh Khua a thliar vek a tul vangin Department a thawktute hian ngawrh takin an buaipui mek a, August ni 12 atang khan zan lamah overtime in an thawk thin nghe nghe a ni. Heng thawktute hi nizan hmasa khan Revenune Minister B. Lalchhanzova chuan tlawhin thawktute thawhrimna leh thahnemngaihna chu chhuanawm a tih thu a sawi a. Chhun lamah nilenga mipui nen an indawr tawh hnua zan lam leh Inrinni bakah pisa chawlhah te rim taka sawrkar ruahmanna tih hlawhtling tura hma an lakna ah Department-a Officer leh Staff te inpekna chu ropui a tih thu a sawi a ni.

Revenue Minister chuan Land Record leh Land Administration ah Central sawrkar leh State upa zawk ten Technology thar nena hma thui tak an lak tawh chu umphak tumin theihtawp chhuah a tul thu sawiin, SASCI hnuaia tih tur min bituk te chu hun tlem te chhunga tih zawh ngai a ni a, chumi ti thei tur chuan Department a thawk zawng zawng te chu Team khat an nih inhre reng chungin tangrual turin a chah bawk a ni.