MSCPCR leh MHIP ten Consultation Meeting an nei

Mizoram State Commission for Protection of Child Rights (MSCPCR) leh Mizo Hmeichhe Insuihkhawm Pawl (MHIP) General Hqrs. chuan nimin khan Consultation Meeting an nei.

Directorate of Agriculture-a SAMETI Committee Hall-a Consultation Meeting hi MSCPCR Chairperson Jimmy Laltlanmawia chuan kaihruaiin MSCPCR chanchin, hnathawh leh a thil tum te hrilhhriatna hun leh ngaihthlakna hun hman a ni a. MHIP General Hqrs. atangin Ngurmawii Sailo, President; Lalliani, General Secretary; P.C. Chuaudingliani, Finance Secretary; F. Lalramliani, Assistant Finance Secretary; Khawlrinpuii, Executive Member leh Lalmuankimi, Executive Member te an tel a ni.

He hunah hian Priscilla Lallawmsangi, Legal Officer, MSCPCR chuan ‘Domestic Workers Welfare and Social Security Act, 2010’ leh ‘Illegal Female Migrant Workers in Mizoram’ tih thupui hmangin zirtirna a pe a, A bikin Aizawl khawpui chhungah awmpui atana naupang, Sikul kai rual kawl an tam hle tih vantlang hriat a ni a, Awmpui chhawr leh kawl, an hlawh bituk chung-changah te leh inkaihhruaina Dan awmsa tha taka zawm chu mipuite mawhphurhna a nih zia te sawi a ni.

MSCPCR Chairperson Jimmy Laltlan-mawia pawhin he hunah hian ‘Aizawl Bazar hmunpui leh Mizoram khaw hrang hrang Bazar-ah te Naupang Nu te’n hna an thawh laia naupangte him leh hlim taka an lo awmna tur, Nau awmna hmun (Creche) tih chungchang a sawifiah bawk a. MSCPCR chuan Creche mamawhna a san zia leh naupangte himna atan MHIP tena hma an lak theih chuan a that tur thu a sawi a. Nimin-a thupui hrang hrang sawihona atang hian hmalak dan tur hrang hrang sawiho a ni a, MSCPCR leh MHIP te chu naupang dikna leh chanvo hum-halhna kawnga thawhho chhunzawm zel a pawimawh thu an sawi bawk