Saitual Town Planning and Dev. Comtt. thukhawm

Saitual Town Planning & Development Committee chu nimin khan a tumkhatna atan thukhawmin hmalakna tur hrang hrang sawiho a ni.

He thutkhawm Saitual DC Conference Room-a neih hi bialtu MLA leh Rural Development Minister Prof. Lalnilawma chuan kaihruaiin Saitual Planning Boundary Description chungchang ngaihtuahho niin, Google Earth Map hmanga Boundary Pillar(BP) hrang hrang thlirho nghal a ni a, bialtu MLA chuan Saitual District chu District thang mek a nih thu sawiin, a than zelna kawngah Town Planning mumal tak neih a tul tih a sawi a. Mipuite hawi khawthawnna tur City Park-te, insawizawina hmun Open gym-te siam theih nise tiin, Saitual Town cheibawlna kawngah hian Committee chuan mawhphurhna sang tak a nei tih a sawi bawk.

He hunah hian khawpuia rem leh rem lo a In sak in chhiatna tam tak a thlen thin avangin khawpui than zelna atan Master Plan neih a tul thu te, Master Plan-in a tum chu khawpui mawi tak leh chenna tlak tura siam a, a mi chengte pawh inlungrual taka an awm theihna a ni tur a ni tih leh chumi tur chuan ramri (boundary) mumal tak siam hmasak phawt a ngaih thu te pawh sawi a ni bawk.