Kum nga chhungin Mizoram GSDP chu 17.99%-in a pung tih CAG Report-ah tarlan a ni

Zonuna Kawlni (LENKAWL) • September 2, 2024 • Comments • Mizoram

Comptroller & Auditor General (CAG) of India report tarlan danin Mizoram Gross State Domestic Product (GSDP) chu kum nga chhungin 17.99%-in a pung a. Hetihlai hian hemi hun chhung vek hian Agriculture leh Industry Sector-ah erawh GSDP hi a tlahniam thung nia tarlan a ni.

Assembly Session neih zawh taka State Finances Audit report 2022-2023 pharh taka tarlan a nih danin Mizoram GSDP thanna hi kum 2018-2023 chhung hian -4.27% atangin 17.99%-ah a kai chho  a, hemi hun chhunga GSDP a chhiat lai ber chu kum 2020-2021 kha niin 4.27% a ni a, kum 2022-2023 ah chuan 17.99%-ah a kai chho niin a tarlang. Hetihlai hian kum nga hun chhung vek hian Agriculture leh Industry Sector-ah erawh GSDP hi a tlahniam thung a. Agriculture Sector-ah hian kum 2018-19t ah 12.35% a nih laiin kum 2022-23-ah erawh chuan 6.89% a ni thung a; Industry Sector-ah pawh 15.90% atangin 14.14%-ah a tlahniam bawk a ni.

Sum hmuhna lamah pawh hmasawnna a awm nia tarlangin CAG report chuan, kum 2022-23 chhung hian Revenue Receipts-ah cheng vbc. 10,282.06 hmuh a ni tiin kum hmasa lama sum hmuh vbc. 9,159.74 aiin 12.25%-in a tam tih a sawi a. State Own Tax Revenue pawh kum hmasa aia vbc. 247.88 (29.02%)-a hmu tamin Non-Tax Revenue-ah pawh kum hmasa aiin vbc 405.56 (65.20%) a tam hmuh a ni.

Hei bakah hian State Share of Union Taxes-ah pawh kum hmasa aiin vbc. 522.39 (12.37%) a hmu tamin sawrkar laipui atanga puihna Grants-in-Aid ah erawh chuan vbc. 53.66 (1.55%) in a hmu tlem zawk thung a. Hmasawnna hnathawhna (Capital Expenditure) pawh kum hmasa (2021-22) ah vbc. 1,004.38 hman anih laiin 2022-23 ah chuan vbc. 1,321.86 hman a ni a, kum hmasa aiin vbc 317.48 (31.61%) in a pung a ni.

Report tarlan danin kum 2022-23 chhung hian sawrkar laipui atangin State Disaster Response Fund (SDRF) ah cheng vbc. 39.20 a dawng a, hetihlai hian State in a tum ve tur vbc 4.36 chu pek a ni lo a. State Disaster Mitigation Fund-ah pawh sawrkar laipui atanga vbc. 15.89 dawn anih laiin State sawrkar tum ve tur vbc 1.59 chu pek a ni lo bawk.

Audit leh a chhehvel

1. Comptroller & Auditor General (CAG) of India report hi August 21, 2024 khan Mizoram Legislative Assembly session-ah pharh a ni.

2. Mizoram Building & Other Construction Workers Welfare Board (MBO-CWWB)-a sum awm zat chu vbc. 70.23 a ni.

3. State leiba chu kum 2021-22-ah vbc. 10,570.93 a nih laiin 2022-23-ah chuan vbc. 10,972.49-ah a pung.

4. March 31, 2023 thleng khan Public Financial Management System (PFMS)-ah Single Nodal Agencies Bank Account 22 thlunzawm tawh a ni.

5. Mizoram sawrkar hnuaiah Drawing & Disbursement Officer (DDO) 1,170 an awm mek.

6. Principal Accountant General, Mizoram chuan Autonomous District Council pathum leh sawrkar hnuai (govt. body) pakhat atangin kum nga kalta chhunga an sum hman dan enfiahna tur chu September 30, 2023 thlengin a la dawng lo. (zalen)