Zirtirtu semrual hna kalpui mek a ni - H&TE Minister

Higher & Technical Education Minister Dr. Vanlalthlana chuan Zirtirtu sem rual chungchang ah sawrkar in hma a la mek tih a sawi.

MZP Hqrs. Champhai ten Govt Champhai College-a Political Science leh Economics Department-a zirtirtu a dah belh an phut mek chungchang ah H&TE Minister Dr. Vanlalthlana chuan nimin khan a Pisa-ah thuthar thehdarhtute kawmin Mizoram puma College Zirtirtute khairual zawka kalpui tur a nih thu leh fimkhur takin Sawrkarin hma a lak mek thu hrilhhriat an nih hnu pawha MZP Hqrs. Champhai ten zirna leh sawrkar hna ti khaihlak zawnga hmalak a ni chu pawi a tih thu a sawi a. Zirtirtu indaihlohna avanga harsatna hi Mizoram sawrkar hnuaia College zawng zawngin an tawh mek a nih thu sawiin, “Zirtirtu semrual hi buaipui mek a nih avangin College pakhat tan a bika Transfer lo tih hian kan zirchianna a tibuai thei a, MZP Hqrs. Champhai hian an hmalakna hi ti chhunzawm lo tur leh zirtirtu semrualna (rationalisation) kan kalpui mek hi lo ngaichang hram hram turin ka ngen leh a ni,” a ti.

Minister in a sawi danin Govt. Champhai College-ah hian Arts, Science, Commerce leh BCA course kalpui mek niin College an neih zingah Stream 4 nei awmchhun an ni a. Regular Teacher 27; Contract Asst. Prof. 7; RUSA Asst. Prof. 4; Part-Time Asst. Prof. 10 leh Casual Teaching Faculty 13, an vaiin 61 an awm a. Mizoram-ah State sawrkar din College (General Stream) 20 awm mekin chung zingah chuan Zirtirtu sanctioned post atanga tehin Govt Champhai College chu Zirtirtu ngah ber dawttu a ni tih a sawi a. “Sanctioned post awm zat Zirtirtu (Regular, Contract, RUSA, Part-Time leh Casual Teacher) nei pha lo College 5 an awm laiin Govt. Champhai College hian sanctioned post 44 nein Zirtirtu (Regular, Contract, RUSA, Part-Time leh Casual Teacher) 61 lai an nei a, hei hi Sanctioned post atanga teha 138.64% lai a ni,” a ti a. Commerce leh BCA erawh Self-Finance Mode-a kalpui a nih thu leh Self Financing kalpuina Department a College in Zirtirtute a rawih tel lo pawh hian College Zirtirtu Sanctioned post aiin zirtirtu an tam tho niin a sawi a. Govt. Champhai College-ah hian Political Science-ah Sanctioned Post 4-ah mi 3 awmin Economics-ah Sanctioned Post 3-ah mi 2 an awm thu a sawi bawk.

Minister chuan Zirtirtu semrual (Rationalisation) kalpui tur chuan zirlai awm zat, Zirtirtu hman theih zat (dam lo, Principal in-charge, Study Leave la, Maternity Leave la, adt paihin), Section awm zat, Major leh Multi-disciplinary paper la zat bakah zirtirtute posting history kimchang neih vek a ngai  tih sawiin, “Hmanhmawh taka tih chuan tihsual neih palh a hlauhawm avangin ngun taka zirchianna neih mek a ni,” a ti bawk.