In chhia 5938 leh nunna chan mi 42 awm tawh

Kumin (2024) hian Mizoram-ah March thla atanga May thla thleng khan leilung chhiatna vanga chenna In leh building dang chhia 5938 awmin mii 42 in nunna an chan bawk.

Nimin khan Mizoram State Disaster Management Authority (SDMA) thutkhawm chu an Chairman leh Chief Minister Lalduhoma hovin CM Conference Hall-ah neih a ni a, he huna tarlan a nih danin kumin March atanga May thla thleng khan Mizoram-ah leilung chhiatna vanga chenna In leh building dang chhia 5938 report awm tawhin kumin chhunga Disaster avanga nunna chan chhinchhiah mi 42 an awm tawh bawk a ni. He hunah hian SDMA sum leh pai dinhmun report ngaihthlak niin inkaihhruaina ang zela an hman chhuah thin dan report te ngaihthlak a ni bawk a. Tunhnaia DM&R hmalakna te pawh ngaithlain Mizoram hmun paruk-ah lirnghing tehna khawl, Seismic Observatory dah mek a nih thu pawh tarlan a ni bawk.

He Meeting hian chhanchhuahna hmanrua leh leilung zirna tur hmanrua engemawzat lei an rel a. Hlimen leh Melthum-a leiminin In leh lo a tihchhiatsak chhungkaw 41 te chen lailawkna tur siam a nih thu leh Hlimen leh Melthum-a hmun him tawk lova ngaih te umzui zel dan tur te an sawi a. Mihring chen tamna hmuna leimin thleng nasa thin tihnep nana tui luankawr leh thli paihdan mumal zawk zirtu tur Study Team din te pawh an sawi a. Heng bakah hian African Swine Fever (ASF) vanga harsatna tawk chhungkua te tanpui dan tur pawh sawiin; mumal zawka chhawmdawlna an hmuh theih dan tur ruahmanna siam nise an ti a ni.

He thutkhawm ah hian Chief Minister Lalduhoma chuan Cyclone Remal vanga chhiatna rawn endiktu Inter Ministerial Central Team ten an report an thehluh tawh thu leh Finance Ministry lama a awm mek thu sawiin, “Tanpuina engemaw zat chu min rawn pek kan beisei,” a ti bawk.