Airport zirchianna Report CM hnenah thehlut

Adviser to CM (Finance) TBC. Lalvenchhunga kaihhruai Working Committee on Lengpui Airport chuan Chief Minister Lalduhoma hnenah nimin khan an Report an thehlut.

Working Committee on Lengpui Airport Report thehluhna hunah hian Chief Minister chuan huntiam chhunga report felfai tak an peih hman avangin lawmthu a hrilh a, “In Report atang hian in thawhrimzia chiang takin a lang a ni,” a ti bawk. Committee Chairman TBC. Lalvenchhunga chuan, “Sawrkarin huntiam min pek chhungin Committee hian report kan peih hman a, a thehluh erawh chu Vawiin-ah kan ruahman ta a ni,” a ti.

Working Committee Member Secretary Vanlaldina Fanai, Commissioner & Secretary, GAD pawhin Working Committee hian Airport enkawl zel dan tur thutlukna a siam lo tih sawiin, thutlukna hi Council of Ministers kuta awm a nih thu leh Committee hi chuan zirchianna a theih anga chipchiarin an buatsaih thu a sawi a. Lalrohlua, Director, Aviation & Member, Working Committee chuan an zirchian dan presentation a pe bawk a ni.

Working Committee to Look into the Maintenance and Management of Lengpui Airport hian July 31, 2024 khan an rawtna te hi Chief Minister hnenah hian thehlut tawhin Chief Minister hi a awm loh avangin nimin khan an rawtna te hi Chief Minister hi an hrilhfiah a. Hemi chungchang ah hian thuthar thehdarhtute zawhna chhangin an Chairman leh Adviser to Chief Minister TBC. Lalvenchhunga chuan Committee chuan IAF, Airport Authority of India (AAI) leh Mimal company-te an dawr tih sawiin, Mimal company zingah chuan Lengpui Airport lachhâwng duh an awm lo niin a sawi a. AAI chuan a thlâwna lakchhâwn an duh a, hun engemaw chen venhimna lam leh thil dangte Mizoram sawrkarin a tum an beisei tel a; hei vang hian AAI kuta hlan chu Mizoram sawrkar tan hlâwkna a awm dawn loa ngaih a ni a. Indian Air Force kuta hlan a nih erawh chuan Mizoram sawrkar tana thatna leh hlâwkna engemaw a awm ve thei dawn a ni.

January 11, 2024-a Chief Minister Lalduhoma hoa thutkhawmna ah India rama Airport dangte enkawltu leh an dinhmunte ngaihtuah chungin Lengpui Airport chu AAI hnenah nge, Private Company hnena hlan tha zawk dawn tih te, Mizoram tana hlâwk ber turte kil hrang hranga zirchiang a, khaikhinna chipchiar nei turin Committee din an rêl a ni a, chumi ang chuan TBC. Lalvenchhunga kaihhruai Committee hi din a ni a. He Committee-ah hian Member Secretary chu GAD Secretary a ni a, a kaihhnawih Department hrang hrang atangin Member an awm a. June 2024 chhunga report thehlut tura tih ni mah se, an zawh belhnate AAI leh IAF ten an chhân har deuh avangin July chhung hun pek belh an ni.