Zirtîrtu sem rual huai takin an kalpui dawn tih School Education Minister in a sawi
School Education Minister Dr. Vanlalthlana chuan Zirtirtu semrual chu huai taka an kalpui dawn thu a sawi.
ZPM Party in nimin-a Aizawl a an party Office-a Chhung Inkhawm an neih ah School Education Minister Dr. Vanlalthlana chuan, “Kan manifesto-a mi Education Department-ah Zirtîrtu sem rual (Rationalisation of Teacher) huai taka kaltlangpui kan tum a, kan thawk mek,” tiin “Intih huaisen leh intihmingthat tum vanga kalpui kan ni lo va, tu pawh Minister se an tih tur a ni,” a ti a. “Minister-te hi Party Manifesto tipuitling tura ruatte kan ni a, Manifesto tihpuitlin hi kan hna a ni. Rationalisation hmangin Zirtirtu transfer dan phung fel zawk, thingtlang lama rei tak awm tawh te leh khawpuia awm rei tawh sawnchhuah ngai te an awm a, hei hian kan zirna hi a siamtha dawn em tih ngaihtuah chungin fimkhur leh dik taka kalpui kan tum a ni,” a ti a. “Manifesto-a kan inzawrhna a taka chantir hi kan tum ber a ni a, bul kan tan phawt ang a, chu chu ataka kalpui kan tum mek a, engemaw harsatna avanga Manifesto tih danglam deuh a ngai a nih pawhin mipui tana tha zawk tur a nih chuan huai taka kan tih danglam a ngai a ni. Mipuite hian an tana thil tha titute chu an hai hauh lovang tih ka chiang a ni,” a ti.Education Consultant leh Education Reforms Committee te neiin an ruahmanna hnuaiah kum thum chhunga Education an kalpui dan tur an duang tawh tih pawh Education Minister chuan sawiin, “Zirna atangin Moral Reform siam kan tum bawk. Ram siamtha tur hian huaisen a ngai a, mi dawihzep tan siamthat theih a ni lo. Sawrkar hmasate a pawng a takin kan sawisel ngawt lova, thil tha tam tak min tihsak tawh tih kan sawi thin. Heti chunga sawrkar hmasate engmah ti lo leh chhe tak anga sawichhuak thina min puh fona hi a dik tawk lo. Sawisel an tulnaah kan sawisel a, fak an tul hunah kan fak mai dawn a ni. Tha ni a kan hriatah chuan huaisen takin kan kal zel dawn a, Chief Minister huaisen kan nei a, Minister te pawh kan huaisen lo thei lo. Opposition beih kan hlauh avangin kan duap dawn lova, Mizoram thatna tur hi kan ngai pawimawh zawk,” a ti bawk.
Sawrkarin report an neih thar berah Mizoram-ah sawrkar School 257-ah zirlai 1,30,000 vel an awm mek thu leh Zirtirtu pawh 10,000 vel bawr an awm mek thu sawiin School Education Minister chuan, School Education Department hnuaiah Directorate, District Office, Samagra, SCERT, DIET, Adult Education leh MBSE te an awm mek a, Higher & Technical Education hnuaiah College 20 chuang awmin Polytechnic College, Hindi College, Scholarship Board bakah Board hrang hrang an awm bawk,” a ti a. “Buaipui tur hi a tam em em a, kan vawikhat sawrkarna a ni a, tihdan kan thiam tawk loh thil pawh tam tak a awm ang. Mahse sawrkar kal tawh ten an tih ngam loh thil tha tak tak ti turin ke kan pen mek a, hei ringawt pawh hi kalphung thar pakhat chu a ni tawh. Sawiselna tam tak kan tawk chho a, kan insiamthatna tur pawh a awm ang. Thil tha a nih chuan huai taka din tlang kan tum zel dawn a ni,” a ti bawk.