Health Department-a vuivaina thlenna tur Online Grievances Redressal Portal 'Vahui' tlangzarh

Health & Family Welfare Department hnuaia Office hrang hrang leh Damdawi In te laka vuivaina leh lungawilohna thlen duhte tana Online hmanga thlen theihna tur, Online Grievances Redressal Portal 'Vahui' tia vuah chu nimin khan Health Minister Lalrinpuii chuan a tlangzarh.

Health Minister Pisa-a Online Grievances Redressal Portal 'Vahui' tlangzarhna hunah hian Health Minister Lalrinpuii chuan Health Department hnathawh dan leh rawngbawlna kawngah mipuite'n harsatna leh lunglawilohna an neihte, awlsam taka thuneitute hnena online hmanga an thlen zung zung theihna tur 'Vahui' tlangzarh a ni ta chu lawmawm a tih thu sawiin, “Hei hi Department tana hmasawnna chhinchhiah tlak tak leh chona thar petu tur a ni,” a ti a. Mizo thawnthu-a Tualvungi ko thiam Vahui tangkai taka hman a nih ang bawka thuneitute koh eihna tura Health & Family Welfare Department-in Vahui Online Portal a siam chu chhuanawm a tih thu sawiin, “A hlawhtlinna atan mipui leh Department thawktute tanrualna a pawimawh dawn a, theihtawp kan chhuah tlan theuh a tul a ni,” a ti.

Health & Family Welfare Minister Lalrinpuii chuan Vahui Online Portal siam chhan sawifiahin, “Mizoram Sawrkar-in vuivaina leh lungawilohna thlenna tur portal 'Mipui Aw' nei tho mah se, Health & Family Welfare Department hnuaia Office zawng zawng, District hrang hranga Sub-Centre hla ber atanga Office pui ber Secretariat thlenga harsatna thlenna tur leh a chinfelna kawng felfai tak mamawhna a awm avangin Vahui Online Portal hi siam a ni a, mipuite'n tangkai taka an hman beisei a ni,” a ti a. Online portal hlawhtlinna chu Office leh Damdawi In zawng zawnga Grievance Redressal Committee-te kutah a innghah tlat thu sawiin, Nodal Officer-te leh Committee-te chu mipui rawngbawlna, a bik takin 'Vahui' hlawhtlin theih nana theihtawp chhuah turin a sawm nghal a ni.

Vahui Online Grievance Portal hi web-based online portal niin Mizoram Health Systems Strenthening Project (MHSSP) bultuma siam a ni a. Online-in Phone leh Computer atangin awlsam taka vuivainate thlen theih a nih bakah chinfel a nih dante a chhuizui theih a. RTI leh a kaihhnawih, thubuai kallai leh thurawn angte erawh a huam tel lo a ni.

Hemi atan hian Health Facility leh Office zawng zawngah Grievance Redressal Committee din niin Nodal Officer-te ruat an ni a. Committee hi Level 4, State Level Committee, District Level Committee, Facility Level Committee leh Sub-Centre Level Committee-te siam a ni a. www.vahui.in-ah vuivainate thlen tur hian mimal information ziahluh hmasak a ngai a, a ziakluttu Phone number-ah Tracking ID SMS in pek a ni ang a, he ID hmang hian an thu thlen chu a thlen chin a chhui theih a, thuneitute'n an chinfel hnuah SMS in chinfel a nih thu hriattirna a dawng ang a, web portal-ah hian chinfel a nih dan a chhui zui theih dawn a ni.

Vuivaina leh lungawilohna lo lutte hi State Screening Center (National Ambulance Services, NHM) chuan lo thliarin a thlenna tur, Target Office emaw, Facility-ah portal kaltlang hian a thawn ang a, Nodal Officer-te'n SMS a hriattirna dawngin a tul angte an bawhzui anga. Ni 7 chhunga chinfel hman tur niin chinfel a nih loh chuan a aia thuneitu sang zawkah thlen a ni anga, chinfel dan hi portal-ah en theih tura dah tur a ni bawk. Portal-a inziaklut theilo tan Grievance Redressal Helpline No 104 ah phone hmangin a biak theih a, portal-ah hian an thu thlen duhte ziahluh sak an ni ang. Heng bakah hian Facility tinah Help Desk a awm zel dawn a, Grievance Box-a vuivaina lutte hi facility in-charge te'n online portal-ah an lo ziaklut zel thin dawn bawk a ni.