Mizoram-ah HIV vanga nunna chan 5021 an awm tawh

Mizoram-ah HIV avanga nunna chan mi 5021 zet an awm tawh.

Nimin khan Mizoram State Council on AIDS chu an Chairman leh Chief Minister Lalduhoma hovin CM Conference Hall-ah an thukhawm a, he hunah hian MSACS Project Director Dr. Lalthlengliani chuan an dinhmun leh hmalakna te tarlangin, MSACS chhinchhiah danin tun dinhmunah Mizoram-ah HIV vei ART damdawi ei 16217 an awm mek a, an zinga mi 500 vel hi chu ram dang mi an ni a. HIV kai hmuhchhuah zingah hian ART ei duh lo, chhui zui theih loh mi 633 awmin HIV vanga nunna chan chhinchhiah 5021 an awm tawh a ni. MSACS hian District tinah ICTC leh ART an nei vek a ni.

National AIDS Control Organization (NACO) hnuaia Estimate lam thiamten kum 2023-a Mizoram dinhmun an chhut danin puitling zinga za zela 2.73 te hi HIV kai thei (state wise Adult HIV Prevalence in % in 2023) dinhmuna ding niin a ngai a. Hei hi India ramah a sang fal hle a, National Level chu 0.2% chauh a ni. Hetianga Mizoram prevalence rate a san chhan hi Mizo-ram in HIV kai kan hmuhchhuah tam vanglai (peak level) a thlen tlai bik vanga ngaih a ni a. Kum 2017 khan Mizoram peak level hi a thleng chauha ngaih a ni a, HIV kai nei tam State dang te chuan 2005 chhovah khan an peak level an lo thleng tawh hlawm a ni. Mizoramin hmuhchhuah san lai ber (peak level) a thlen hnu hian kai thar hmuh-chhuah zat hi a tlahniam zui ve hret hret a ni.

Nu, HIV vei ten nau an paiin an naute chu HIV laka venhim theih a ni tih he hunah huan tarlan a ni a. Hetianga HIV inkaichhawn hi tihbo hmiah tumin tan an la mek a. Nikum chhung pawh khan HIV vei nu nau hring mi 120 atangin naute a kai zui ta hi pahnih chauh an awm a. He hmalakna hi a hlawhtlin ngei theih nan nu naupaite dinhmun hi rang taka hriat a ngai thung a ni.