Zirtirtu indaihlohna siamrem turin hmalak a nih thu sawi

ZPM Party chuan Zirtirtu indaihlohna siamrem turin sawrkar in hma a la mek tih an sawi.

Nimin-a thuchhuah an siamah ZPM Party chuan Kalphung thar mipui Sawrkar hnuaiah School Education Minister Dr. Vanlalthlana hmalaknain Mizoram Zirna siamthat hna thawh mek a nih thu sawiin, tunhnaiah Casual Teacher thahnem tak High School, Middle School leh Primary School-a Zirtirtu indaihlohna phuhru tura lak an ni tih an sawi a, hei bakah hian School building chei that ngai leh sak that ngaite pawh theihtawpin Sawrkarin a thuamtha mek tih an sawi a. Kan ram zirna siamtha tur hian a tahtawl te te a hmalak a ngaih avangin tunah hian College hrang hranga zirtirtute indaihlohna siamrem tura zirchianna neih mek a nih thu pawh sawiin, Mizoram College hrang hranga Zirtirtu indaihlohna rualkhai zawka siamrem tura hmalakna hi hna hautak tak mai a nih thu leh fimkhur taka leh thuhnu dawn taka kalpui ngai thil a nih avangin thawk lehkhatah a tih zung zung theih loh tih an sawi a ni. ZPM Party chuan Champhai College-a Zirtirtu indaihlohna chungchanga MZP te hmalakna chu an hriatthiampui thu sawiin, Minister hmalakna chu dawhthei taka lo ngaichang tura an duh thu an sawi a, “Thil tha duhtute ve ve indawrna ah hian inhriathiam tawnna leh College bil bik harsatna thlir lova, a ram pum huap College zirtirtu indaihlohna hrethiam chunga, dawhthei taka Sawrkar hmalakna lo ngaichang turin kan duh hle a ni,” an ti.