National Space Day, 2024 lawmna neih a ni

Nimin August 6, 2024 khan ‘National Space Day, 2024’ lawmna chu Aizawl-a Assembly House, Annex-ah neih a ni a, he hun hi School Education Minister Dr. Vanlalthlana chuan khuallian niin a hmanpui a ni.

Indian Space Research Organisation (ISRO), North Eastern Space Applications Centre (NESAC) leh Mizoram Remote Sensing Application Centre (MIRSAC) tangkawpin an buatsaih National Space Day, 2024 lawmnh ah hian Education Minister Dr. Vanlalthlana chuan National Space Day mai ni lo, August ni 23, 2023-a thla chhim tawpa Chandrayan 3 Moon Lander Shiv Shakti Point-a a tum (soft landing) champha hriatrengna leh lawmna hun pawimawh tak hman theih a ni chu lawmawm a tih thu a sawi a, he hlawhtlinna hian mi tam tak rilru-ah Vanthengreng zirbingna (Space technology) leh Vanthengreng hriat chak lehzualna naupang zawkte rilru ah a chawh thawh mai bakah hun lo la awm zel tur tana Mellung pawimawh tak a nih thu a sawi a. Vanthengreng hriatna chu kan ram ngei pawhin kan hmang tangkai hle a, a bik takin ka enkawl School Department hnuaia School naupangte thlipui leh ruahpui laka lo invenlawkna kawngah leh kan ram-a chhiatrupna thleng thei laka lo inralrinna kawngah thil tangkai tak a ni thu a sawi.

He hunah hian Dr. Rocky Pebam, Sci/Eng SF, ISRO-NESAC, Shillong chuan India ram chu thla leilung thleng thei ram 4-na kan nih thu a sawi a. Dr. Senthil Kumar G, Sci/Eng SF, ISRO-URSC, Bangalore chuan Moon Mission chungchang, Chandrayan 3 Mission an kalpui dan a lem nen a entir a. Chandrayan 3-ah hian Propulsion Module, Lander Module (Vikram) leh Rover Module (Pragyan) te awmin tunah hian Lander Module leh Rover Module te hi thla leilung zirbingna (research) titur a design a nih angin an awm mek a, Propulsion Module chu thla orbit atangin lei a laklet a ni a. Khawvel atang hian thla hi km nuai 4 vel niin Chandrayan 3 hian Thla thlen nan ni 40 vel hun a hmang a. India chu USA, Russia, China hnuah thla leilung thleng thei ram palina a ni a. Thla leilung thleng thei ram te hian thla leilung atang hian thil tam tak zirbingna neiin thla leilung atang hian vanthengrenga thil dang awm (Celestial bodies) te awlsam zawkin an zirchiang thei dawn bawk a ni.

National Space Day hmanna hi Lalmalsawma Pachuau, Secretary, P&PID, Govt. of Mizoram chuan kaihruaiin National Space Day, 2024 puala Quiz buatsaih lawmman sem nghal a ni a, he Quiz-ah hian School 25 atangin naupang 2 theuh an tel a. Lawmman pakhatna hi Govt. Saitual HSS-in dawngin pahnihna Govt. Mizo HSS leh pathumna Synod HSS an ni a. He hunah hian Er. H. Lalsawmliana, CSO, DST & Member Secretary pawhin thu a sawi bakah NESAC & MIRSAC Team atangin Audio Visual Show & Space Exhibition Display thlirho a ni bawk.