Zirlaibu thleng finfiah

Mizo Zirlai Pawl (MZP) General Hqrs. chuan nimin khan Aizawl-a zirlaibu dahkhawmna hmun tlawhin Zirlaibu tam zawk thleng tawhin, a la thlêng lote pawh kawng lakah a rawn kal mek tih an finfiah tih an sawi a, a mamawhtute hnen a thlen vat theih nan enzui zel an tum thu an sawi a ni. MZP chuan Zirlaibu chhut nana, Mizoram Sawrkar-in budget-ah cheng nuai 100 a dah chu lawmawm an tih thu sawiin, “Hei hian Zirlaibu chhut nana sum lama harsatna a tihziaawm ngei a rinawm,” an ti a. Zirlaibu sem chungchangah kumtin-a buaina chinfel tumna tak tak awm lo thin chu sawrkar thar in ruahmanna felfai tak siam se an duh tih an sawi bawk.

MZP chuan tunhnaia Assam Police ten an Camp panna kawng an laih chung-chang ah sawrkar thuneitute hnena an ngen anga Kolasib DC leh Cachar DC te inbiain kawng laih mek titawp tura hrilh an ni chu lawmawm an tih thu an sawi a. Mizoram ramri venghimtu sipai camp kal pawhna kawng chhe lutuk leh kalpawh zung zung harsa lutuk hi tha taka siam vat turin sawrkar an ngen nghal bawk.