Post Office 556 awm mek

Postal Department Mizoram Division hnuaia Mizoram hmun hrang hranga Post Office 556 awm te chuan tunlai thiamna, Internet hmangin hna an thawk thei vek tawh.

Postal Department Marketing Executive HS. Lalnghakliana sawi danin Mizoram chhungah Post Office 556 a awm a, heng ah te hian tunlai thiamna hmanga hnathawh theih vek a ni tawh a, Core System Integrator hmangin awlsam zawka hnathawh theih niin Kum 2022 May ni 13 atangin Sub-Division ah bultanin tun dinhmunah khaw tam zawkah Post Office awm te chu thlunzawm vek a ni tawh a ni.

HS. Lalnghakliana chuan Postal Department, Mizoram Division chu NE Circle chhunga Ministry of Communication, Govt. of India hnuaia awm a ni tih sawiin, Mizoram Division chu Sub-Division 4-ah then leh a ni a, Aizawl East leh Aizawl West Sub-Division leh Lunglei Sub-Division bakah Chhimtuipui Sub-Division te niin tun dinhmunah Mizoram-ah Sub-Post Office 39 a awm mek a, Branch Post Office 417 awmin a vaiin Post Office 556 a awm mek a ni.

Tunlaiah lehkha sem tihtlem zel ni tawh mahse an hnathawh chu tunlai milin a inthlak ve zel tih Marketing Executive chuan sawiin, State sawrkar in IFMIS an hman angin Core System Integrator hmangin hna an thawk a, hei hian an theihna a tihpun bakah an hnathawh chu a pun phah tih a sawi bawk.

HS. Lalnghakliana chuan Internet hmanga hna an thawh bakah Speed Post hmangin lehkha leh parcel thawn te leh ramdang atanga pawisa inthawn Western Money chu an buaipui hnem tih a sawi a. Pawisa a pung awma dah theihna scheme hrang hrang a awm tih sawiin, Mizoram mipuiten pawisa dahkhawl uar tura a duh thu a sawi a. Post Office a pawisa lut a tam thu sawiin, State sawrkarin pawisa a puk theih a tam thin tih a sawi a, Post Office-ah sum dahkhawlin State tan hna tha tak mitinin an thawk thei tih a sawi bawk.