World Photography Day-2024 hman a ni

Nimin August 19, 2024 khan ‘World Photography Day’ vawi 185-na pualin Aizawl Vanapa Hall hun hman a ni a, Art & Culture Minister C. Lalsawivunga chuan a hmanpui a ni.

Mizoram sawrkar-a Information & Public Relations Department, Mizoram Photographers' Society (MPS) leh Photography Club of Mizoram (PCOM) te tangkawp buatsaiha he hun hman ah hian Art & Culture Minister chuan mi tinin Smart Phone kan hum fur tawhna leh mitinin thlalak kan uar em em na khawvelah kan cheng mek tih sawiin, “Mahni leh midang tana mualpho theihna tur pawh then hrang thiam tawh lovin, thla kan la-in kan thehdarh nasa mah mah niin a hriat a ni,” a ti a. Chutiang khawvela kan chen mek lai hian MPS leh PCOM te chuan a tha zawnga kan hnam ziarang leh incheina te, kan ram mawina leh khawtlang nun te khawvel zau zawka phochhuahna kawngah sulsutu leh kawng kawhhmutu nih tum tlat turin a chah a ni.

World Photography Day pual hian thlalak inelna buatsaih a ni a, Photographers 97 ten thlalak 468 an thehlut a ni. Heta a tha zual 100-te hi Exhibition gallery-a phochhuah an ni. Thalak te hi Category 3- One Earth, Colour leh Monochrome-ah thenin, Category tinah lawmman pakhatna atangin pathumna thleng leh Consolation prize mi 5 hnenah pek theuh an ni bawk.

World Photography Day-2024 pual hian August 19-21, 2024 chhung hian Photo Exhibition-cum-Sale bakah Photo gear (Thlalamite tana tangkai tur Camera bungrua, Computer, printing hmanraw hrang hrang) discount rate a hralhchhuah a ni bawk ang.