Ruang phurhna atan inkaih-hruaina tihchhuah a ni

Mizoram sawrkar chuan ruang phurh a kalpui turah Social Welfare & Tribal Affairs, Women & Child Development chu Nodal Officer atan a ruat a, he ruahmanna kalpui tur hian inkaihhruaina (Guidelines) pawh tihchhuah a ni.

Tun thla ni 14 khan sawrkar chuan thuchhuah siamin Ruang phurh (Assistance for Transportation of Bodies of Deceased within Mizoram) atan hian Social Welfare & Tribal Affairs, Women & Child Development chu Nodal Officer atan a ruat an ni tih a tarlang a. hemi atan hian inkaihhruaina pawh tihchhuah nghal niin thla thar September 1 atanga kalpui tur a ni ang.

Inkaihhruaina a tarlan a nih danin Ruang phurhna lirthei hman man hi ruang phurh tanna hmun leh ruang dahna khaw inkara Motor hman man niin Ruang phurh tanna leh a dahna hmun inkar hi KM 20 aiin a hnai tur a ni lo thung a, he ruang phurh hian lirthei pakhat huamin ruang phurhna Motor chauh a huam dawn bawk a. Ruang phurhna hlat zâwng chhût nan hian Economics & Statistics Handbook hman a ni anga. State Transport Authority rate siam chu hman tur a ni ang.

Guidelines-a tarlan a nih danin ruang phurhna man hi rulh let tur a ni a, ruang phurhna motor hman man diltuten thla khat (1) chhungin dilna chu application form siamsa angin Director, Social Welfare & Tribal Affairs hnenah emaw, an District chhunga District Social Welfare Officer hnenah emaw an thehluh tur a ni a, Damdawi In-a thi a nih chuan Death Certificate pangngai emaw, a thihna hmun Damdawi In-a Doctor-in a thi a ni tih a ziahna thiltel tur niin Damdawi In a thi an nih loh chuan LC/VC President emaw Secretary emaw leh YMA/YLA/MTP ten an hriatpuina tarlan tel a ngai a. Motor hmanna receipt original copy bakah Mitthi Aadhaar card emaw Voter ID emaw a photocopy thiltel tur niin document kim lo chu pawm a ni lo bawk.