Village Council 88-te hnena Computer Set sem a ni

Mizoram-a Village Council te hnena Computer semna hun chu nimin khan Local Administration Department (LAD) Minister C. Lalsawivunga Pisa-ah neih a ni.

VC te hnena Computer semna hunah hian LAD Minister chuan heng Computer te hi Rashtriya Gram Swaraj Abhiyan (RGSA) Scheme hnuaia mi a nih thu leh Ministry of Panchayati Raj kaltlanga dawn a nih thu a sawi a. Tun tumah hian VC 88 te hnenah Computer set pakhat theuh sem tur ni mah se VC 88 te inkohkhawm a hautak avangin VC 88-te aiawh atan Sumsuih leh Nisapui VC te hnenah Computer set hi sem a ni ta zawk tih a sawi a. Sustainable Development Goals (SDGs) an tihhlawhtlin theihna tura Village Council-te tihchak leh thuamchak a tul thu sawiin, Training chi hrang hrang hmanga VC te hriatna leh thiamna tihhmasawn te, khawtlang rorelna leh inrelbawlna hmunpui an neihna tur atana Panchayat Bhawan (VC House) pek te, tualchhung mipui te tana tangkai zawk leh awlsam zawka rawng an bawl theih nan Computer leh Common Service Centre (CSC) VC te hnena pek te chu RGSA Scheme hian a tum a nih thu a sawi bawk.

LAD Minister chuan Village Council member te fuihna thu sawiin, VC member te chu mipui kaltlanga Pathian in khawtlang inrelbawlna-a a fawng vuantu tura a ruat te an ni tih sawiin, “Rinawm tak leh taimak takin thawk ula, in rinawmna chu Pathian hnena rinawmna ni rawh se, Pathian hnena kan rinawmna hian rinawmna dang dang a huam vek a ni. Hleih neih miah lova khawtlang rorelna kalpui te hi Pathian hnenah rinawmna chuan a huam vek a ni,” a ti a. Computer set an dawn hian khawtlang rawng an bawlna kawnga IT (Information Technology) kaihhnawih thilah nasa takin a pui dawn tih pawh a sawi a. VC inrelbawlna Dân thar duangin, Consultation neih mek a nih thu leh VC inthlan leh hunah chuan VC dân thar hnuaiah kan inthlan theih pawh an beisei tih a sawi a, Panchyat Bhawan pawh kuminah a tam thei ang bera sak tum a ni tih a sawi bawk.

He huna tarlan a nih danin RGSA hnuaiah hian nikum khan VC te hnenah Computer set 261 lo semchhuah tawh a ni a, kumin-a 88 an sem nen chuan a vaiin 349 an semchhuak tawh a ni. LAD Joint Director Lalchawimawia chuan tuna an Computer Set sem te hi Government e Marketplace (GeM) kaltlang veka lei an ni tih sawiin, Computer Brand tha leh lar tak ECER a ni a, VC ten Computer configuration tha tak an dawng theih tur chu LAD pawh an lawm hle tih a sawi a. RGSA Scheme hian Mizoram chhunga Village Council zawng zawng Autonomous District Council area a mite nen a huam vek a. VC zawng zawngin Computer an neih vek theih nan Sawrkar chuan theihtawpin hma a la mek tih a sawi bawk.