Sum ruahman ah Rajya Sabha MP in lawmthu sawi

Mizoram Rajya Sabha MP K. Vanlalvena chuan North East State 8-te zingah Mizoram chu Assam tih lohah MoRTH hnuaia Motor kawngpui siamna atana Budget chang tam ber a ni chu lawmawm a tih thu a sawi.

Parliament Budget Session neih meka Union Budget sawihona hun niminpiah tlai-a neih ah Rajya Sabha MP K. Vanlalvena chuan Ministry of Road Transport and Highway (MoRTH)-in North East State hrang hrangte tana National Highway siamna tura sawrkar laipui sum ruahman dan chu Arunachal-ah cheng vbc. 5327; Assam-ah cheng vbc. 34,198; Manipur-ah cheng vbc. 13,779; Meghalaya-ah cheng vbc.7219; Mizoram-ah cheng vbc. 16,606; Nagaland- cheng vbc. 10,643; Sikkim-ah cheng vbc. 4494 leh Tripura-ah cheng vbc. 5106; a vaiin North East tan cheng vbc. 97,372 a nih thu a sawi a. Mizoram chu North East-a National Highway siamna tur Fund pek tam ber dawttu a nih avangin lawmthu a sawi.

Rajya Sabha MP K. Vanlalvena chuan Mizoram chu tlangram a nih avangin inkalpawh nan Rail kawngte, Lawng kawngte aiin Motor kawngpui tha chu mamawh ber a nih thu a sawi a. Hemi atana Central sawrkara Ministry of Road Transport and Highway-in Mizoram hmun hrang hranga Two Lane Road an siam mek te, Aizawl by-pass road siamna turte, Silchar to Aizawl Four Lane road siamna tur te, Zorinpui to Lawngmasu National Higway atana puan thar te, Saitual to Tuivai kawng te, Lunglei to Tlabung kawng atana budget-a cheng vbc. 16,606 dah a ni chu lawmawm a tih thu a sawi a. Tunhmaa darkar 14 chhung tlan thinna Aizawl to Tuipang chu tunah chuan darkar 8 a thlen theih tawh a nih thu te, darkar 10 hman thinna Aizawl to Champhai pawh darkar 5 ah thlen theih tawh thute sawi bawkin, hei hi Mizoram tana hmasawnna ropui tak a nih thu a sawi lang bawk a ni.