ULLAS Mela & Mizoram Samagra Shiksha Exhibition neih a ni

School Education Minister Dr. Vanlalthlana chuan nimin khan Aizawl-a Govt. Mizo High School Multipurpose Hall-ah 'ULLAS Mela & Mizoram Samagra Shiksha Exhibition 2024' chu a hawng.

Ni hnih (2) awh tur' ULLAS Mela & Mizoram Samagra Shiksha Exhibition' hawnna ah hian Education Minister chuan Samagra Shiksha hmalakna avang hian zirna hi a kal tawk tawk tih sawiin, an hmalakna a pawimawh thu a sawi a. Mizoram-ah zirnain hma a sawn loh chuan khawtlangah zan mut theih loh khawpa buaina te, chhungkaw buaina te a awm thin a, khawtlang leh chhungkua hahdamna hi kan tuak chhuah a ngai a, chumi atan chuan Zirtirtute leh Officer te tanho a ngai a, kan hma zawna thil tih tur awmah theihtawp kan chhuah chuan mitin hahdamna hi kan tuak chhuak thei dawn a ni, a ti.

Samagra Exhibition-ah hian Stall hrang hrang 22 siam a ni a, heng Stall-ah te hian ULLAS chungchang leh Mizoram zirlaite tana Samagra Shiksha hnathawh chi hrang hrang phochhuah a ni a, Samagra Shiksha hnathawh mai bakah MBSE, SCERT leh PM Poshan hnathawh leh hmalaknate phochhuah a ni bawk. Samagra Shiksha hnathawh zingah hian Sports & Physical Education, Skill Education, Inclusive Education, Civil works, Community Mobilisation, Kala Utsav, Rangotsav, Band Academy, Gender & Equity, Vidhyanjali, ULLAS, PM SHRI, Foundational Literacy and Numeracy(FLN, NIPUN Bharat leh Media cell hnathawh te entir a ni a. Heng an hnathawh chi hrang hrang an phochhuah te hi ziaka sawifiahna an sem tel zel bawk.

ULLAS MELA leh Samagra Shiksha Exhibition-ah hian State Project Director Lalsangliana chuan keynote address sawiin, ULLAS in a tum chu mi zawng zawngin ziak leh chhiar an thiam theihna atana hmalak a nih thu leh hemi atana sawrkar hmalakna te a sawi bawk.