Tuihna humhalh leh Faina kawnga thawhhona sawiho

PHE Minister Prof. Lalnilawma chuan nimin khan a pisa-a leng-ah Central YMA hruaitute sawmin tuihna humhalh leh faina kawnga an thawhhona chungchang a sawipui.

Central YMA hruaitute nen an inkawmna ah hian PHE Minister chuan tuihna humhalh leh faina kawngah Central YMA leh PHE Department-in thawhdunna tha tak an lo neih tawh chu chhawmnun zel a tul thu sawiin, hemi kawngah hian nasa lehzuala tanlaka intawiawmtawn zel a pawimawh thu a sawi a. Thurawn inpek leh harsatna thlen kawngah inthlahrung lo turin a chah a. Central YMA President Lalhmachhuana pawhin Minister lawmpuina thu sawiin, a enkawl PHE Department chu thawhpui nuam an tih thu a sawi a. YMA inkhawmpui lian vawi 74-na Biate-a neihin tuihna humhalh kawngah tun aia nasa zawka hmalak a rel thu sawiin, bawhzui a nih dante a tarlang a. Tuihna humhalh leh faina kawngah YMA chuan Sawrkar tha taka a thawhpui zel dawn thu a sawi bawk. 

He hunah hian tuihna humhalh leh faina kawnga hmalak tlan dante thlirho niin, tuilakna lui leh a kam-a awm tuihna siamtu thing leh maute an chereu mai loh nana humhalh tura tanlak lehzual a tul thu leh hmalak dan turte sawiho a ni a. Luidung tibawlhhlawhtu hnawmhnawk thianfaia faina kawnga hmalak a tul thu pawh sawiho niin, Mizoram pumah faina hnatlangpui buatsaih ni se an ti a. Tuihna humhalh leh faina kawngah a taka chet chhuah a tul thu leh thangtharte zingah zirtirna uar zawka kalpui a tul thu tarlan a ni bawk a. Sawrkar Scheme pawimawh tak Jal Jeevan Mission (JJM) leh a dangte kaltlangin tuilakna leh In tin thleng phak tui pekna siam ni mah se, tui herhhaw mai tur a awm leh si loh chuan hmasawnna ruhrel siamte'n awmzia a neih dawn loh avangin tuihna humhalh leh a siam theitu tihpun kawngah ngaihtuahna sen tlan a tul thu an sawi bakah inpawh tlang takin tun aia thawhdunna chak zawka kalpui dan turte an sawi a ni.

PHE Department leh Central YMA te hian kum 2012 atang khan 'Kan rama tuihna humhalh leh a awmsa tihpun' tih thiltuma neiin thawhdunna thuthlung an ziak a, hemi hnu hian thawhdunna thuthlung chhunzawmna tum hnih ziah a ni leh tawh a. Tuna thawhdunna kalpui mek hi October ni 28, 2021 khan ziah niin kum 4 chhung, 2021-2025 thleng a awh dawn a, a zawh hnuah a tul anga ennawn leh tura tih a ni. Heng bakah hian kum 2017 atang khan tuihna humhalh bakah faina kawngah pawh an thawkdun tel bawk a ni.

He inkawmna ah hian  Er. F. Liantluanga, Secretary, PHE; Er. Lalrothanga, Engineer-in-Chief, PHE; Er. H. Duhkima, Chief Engineer, Zone-II & Director, PMU; Central YMA OB te bakah Central YMA hnuaia Science & Environment Sub-Committee member-te an tel a ni.