Ram zalenna champha vawi 78-na lawm tur pualin Governor in State mipui te chibai a buk

Mizoram Governor Dr. Hari Babu Kambhampati-an ram zalenna champha vawi 78-na Vawiin-a lawm tur pualin State mipui te chibai a buk a, ram tana Zalenna sualtu te inpekna zahawm tak hre rengin ram pum a khua leh tui te rualin Hnam pasalthate zah takin chibai a buk tih a sawi a ni.

Independence Day lawmna puala a thuchah ah Governor chuan Prime Minister Narendra Modi-a’n kum 2047-a ram changkang- Developed Nation-a India ram hlankai a tumna thlawp turin mipuite a chah a, Viksit Bharat ni turin Viksit Mizoram nih tum hmasak a ngai a ni, a ti. Larsap chuan Mizoram chu sum leh pai lama harsatna tawk State a nih thu sawiin, hetiang dinhmun ah hian mipui vantlang ten Central Sawrkar hnuaiah Social Security Scheme tam tak a awm tih an hriat a ngai a, heng Scheme hrang hrangte hi a kaihhnawih thuneitute, Bank leh Official dangte hnen atanga zawtfiah turin mipuite a chah nghal tih a sawi bawk.

Mizorama hmasawnna ruhrel lian tham zawk te din ti harsa em em tu pakhat chu inkalpawhna kawngpui tha tawk lo chu a ni tih Governor chuan sawiin, hei vang hian Bairabi-Sairang Railway line siam zawh hun tur a nghahhlelhawm takzet a, a chhan chu he Rel kawng hian Mizoram hmelhmang a la rawn thlak danglam dawrh dawn a ni, a ti a. Chutih rualin Central sawrkar atanga sum tam tak kawngpui siamna atan Mizoram in a dawng chunga kawngsiam hna tam zawk te zawh a ni lo chu a pawi a ti takzet tih a sawi a, dam khawchhuahna kawngpui tih mai, Vairengte-Sairang National Highway 4-Lane zawh a la ni lo phei hi chu a pawi zual a, chhut thiam phak bakin mi a ti thuanawp mek a ni, a t ai. Kawngpui tha neih hmasak hi hmasawnna ruhrel lian dang te din tura thil pawimawh hmasa ber a ni tih hriat nise, a ti bawk.

India Independence Day lawm hi boruak muanawm tak hnuaia hman a nih theihna turin venhimna pawh khauh taka ruahman a ni a, Aizawl leh State chhung khawpui dangah te venhimna uluk zual a ni a, khawi atang maha thil duhawmlo thleng a awm loh na turin Police chuan hma an la tih IGP (Law and Order) Lalbiakthanga Khiangte chuan a sawi a ni.