IAF kuta Lengpui Airport hlan tumna dodal zel tum

MNF Party chuan Mizoram Airport neihchhun tichhe vek tur zawnga Indian Air Force kuta hlan tumna chu a tawp thlenga dodal an tum tih an sawi.

Nimin-a Aizawl Press Club-a thuthar thehdarhtute an kawmna ah MNF Publicity Board Vice Chairman J. Malsawmzuala Vanchawng chuan Mizorama ZPM sawkar lo dingin a tirte atanga Mizoram in thlawhna tumhmun a neihchhun Lengpui Airport thehthang dan tur a dap nghal char char mai leh, Indian Air Force kutah pawh hlan mai a duh dawn nia a lang ta mai chu an duh lo takzet tih a sawi a. ZPM Sawrkar lo pian hlim, December ni 14, 2023 khan Council of Ministers thukhawm chuan midang kuta Lengpui Airport hlan dan dap hi relin, a zirchiang tura din Working Committee in tunhnaia Chief Minister hnena rawtna an thlenah Air Force kuta hlan rawtna hi a lo lang ta tih sawiin, Sawrkar lo awm tawh ten harsatna tam tak paltlanga an lo din leh harsa taka an lo tih changtlun chhoh, Mizoram tana ro tling (Asset) pawimawh tak ZPM sawrkarin thehthang a tum dan chu mipuite pawisawina nasa tak a nih dawn avangin MNF chuan a pawmpui theih loh thu leh a tawp thlenga dodal an tum thu a sawi a ni.

Indian Air Force ten Lengpui Airport an hman dan tur leh Mizoram miputen kan mamawh dan chu thil inpersan hlauh a nih thu MNF Publicity Board Vice Chairman chuan sawiin, “Indian Air Force chuan venhimna (Security) lam an ngaihpawimawh ber laiin, Mizoram mipuite tan chuan thlawhna hmanga zin veivahna (Connectivity) kan neih chhun anih avangin Indian Air Force kuta hlan anih rualin Mizoram mipuiten harsatna nasa tak kan tawk nghal dawn a, hmun danga Civil Airport anga hman, Indian Air Force thuhnuaia awmte ang bawkin than zel chu sawi loh, thlawhna service awm mekte pawh a tlem zel ang a, a tuartu chu Mizoram mipuite kan ni dawn,” a ti a. “Indona a lo thlen thulhah pawh IAF air-base lian chu hmelmate bitum (target) hmasak ber tur a nih dawn avangin Lengpui khua mai nilovin Zoram mipuite tan a him lo hle dawn a ni,” a ti.

MNF Publicity Board chuan Lengpui Airport hi a than chak avang leh a pawisa thawhchhuah pawh a pun zel avangin AAI-te nen pawh indawrna a lo awm tawh thin tih sawiin, “Mizoram tana ro (Asset) hlu tak anih avangin midang kuta hlanchhawn dan turah Sawrkar kal tawhten uluk takin ngaihtuahna an lo seng thin a. AAI hotute leh Civil Aviation lam hotute pawh tum 16 zet an lo thukhawm tawh a, Mizoram in a hlawkpui tur leh Mizo mipuite pawhin an pawm tlan theih tur inremna a la awm thei lo,” an ti a. “Mizoram pawhin kan hlawkpui tur leh kan thatpui tur nei thei ila, AAI kutah emaw, Company kutah emaw hlan hi MNF chuan a dodal ngawt lo a. Kan Airport neihchhun tichhe vek tur zawnga Indian Air Force kuta hlan tumna erawh a tawp thlenga dodal kan tum a ni,” an ti bawk.