Serchhip District-a khualbuk te Faina kawnga inelna tur, Swachata Green Leaf Ratings hawn a ni
Serchhip DC Meeting Hall-a Swachata Green Leaf Ratings hawnna hunah hian Bawrhsap chuan Serchhip District chu District fai a nih thu sawiin, hmun dangte tan pawha entawntlak an nih theihna turin mi tinin faina ngai pawimawhin, an rilruah ‘Clean Serchhip’ tih dah reng turin kalkhawm te a sawm a. Bawrhsap chuan “Kristian kan nih ang pawhin kan thinlung, kan taksa leh kan chhehvel te kan tihfai hian Pathian min hnaihtir thin a ni,” tiin, Swachata Green Leaf Ratings hawnna programme-a kalkhawm te chu an thil zir leh an hriatthar te chu faina kawnga hma an sawn theihna tura fuihtu leh tihphurtuah hmang turin a chah a ni. Bawrhsap chuan Serchhip District chhungah hian khuanu duansa hmun mawi leh thlir chakawm tak tak, tualchhung leh ram pawn atanga khualzin te pawh hip thei tur hmun tam tak a awm thu sawiin, heng hmunhma nuam tak tak te hi a tlawhtu leh a neitu mipui ten an vawn thianghlim a pawimawh zia te; khualzin mi te thlen In -Homestay, Hotel, Lodge leh Rest House te pawh vawnfai a tul zia te; zin veivak ten riah an chakna leh tlawh nawn leh an chakna hmuna siam theitu an nih dan te inhria a, tan la lehzual turin a fuih a. Swachata Green Leaf Ratings hman tan a nih dawn avangin tehfung hrang hrang te hrechiang a, ratings tha an neih theihna tura tan la turin Bawrhsap chuan a sawm bawk a ni.
Swachata Green Leaf Ratings hi November 2023 khan Sawrkar Laipui-a Department of Drinking Water and Sanitation leh Ministry of Tourism tangkawp chuan kalpui tanin Travel for Life Campaign hnuaiah khualzin te chawlh hahdamna hmun endikna tura dan thar ni ta hi a duang chhuak a. Hotel, Resort, Homestay leh khualzinten thlenna hmun atana an hman zawng zawng, sawrkar leh mimal enkawl te chenin a huam vek a ni. Tourism Department nena tangkawpin PHE te chuan Serchhip District chhungah khualzin te thlenna hmun 26 an thlangchhuak a. Heng hmunhma neitu leh enkawltute hi kohkhawmin nimin-a hun hman ah hian Swachata Green Leaf Ratings chungchang inzirtirna te leh tehfung hrang hrang hmanga teh an nih dan tur te hrilhfiah an ni a. Khualzin te thlenna hmunhma te hi bawlhhlawh sakhat an sawngbawl dan (Solid Waste Management), Zun leh ek thli an thenfai dan (Fecal sludge management) leh Choka/Bathroom/Insukna thli an tihfai dan (Greywater management) hmang te a teh an ni dawn a. SDO (Sadar) kaihhruaina hnuaiah Verification Team ten an endik dawn a ni.
Nimin-a Swachata Green Leaf Ratings hawnna leh inzirtirna hun hi PHE Serchhip WATSAN Division-a Sr. EE Isaac Lalchhuanmawia chuan a kaihruai a. District Coordinator Samuel Lallawmzuala chuan Swachata Green Leaf Ratings awmzia leh tehfung hrang hrang te a sawifiah a, Addl. DC Lalrinzuala’n lawmthu sawiin hun hnung a khar a ni.