Kumin ah PMJVK atanga sum hmuh a lo ni lo; PMJVK sum la hmuh loh chhan ah ngaihdan a inang lo

District Council & Minority Affairs Minister C. Lalsawivunga'n kumin ah PMJVK atanga sum hmuh a la ni lo tih a sawi a. Finance Department changtu Chief Minister Lalduhoma chuan PMJVK kaltlanga sum an la dawn loh chhan chu sawrkar hmasa huna hna thawh zawh loh tam lutuk vang niin a sawi thung.

Nimin-a Mizoram Legislative Assembly thutkhawm-a zawhna leh chhanna hunah Dampa bialtu MLA Lalrintluanga Sailo zawhna leh zawhbelhna dang a chhannaah DC&MA Minister C. Lalsawivunga chuan Sawrkar thar pian hnu 2023-2024-ah PMJVK hnuaiah project-te ngaihtuah turin State Level Committee an thukhawm tawh tih sawiin, kum 2023-2024-a State Level Committee rawt angin Project Proposal 65 thehluh a ni a, hetihrual hian Sawrkar tharah PMJVK sanction thar hmuh a la ni lo tih a sawi a. Sawrkar hmasaah Project engemaw zat siam leh buatsaih a ni a, chungte chu sawrkar tharin theihtawp chhuahin a um zui a, sawrkar laipui-a Minority Affairs Ministry-ah Project te chu thehluh vek a ni tawh tih a sawi a, sawrkar laipuia sawrkar thar a din hnuah Empower Committee-te an la thut loh avangin Project an thehluhte chu ngaihtuah theih a la ni lo tih a sawi bawk.

Minister C. Lalsawivunga chuan, PMJVK hnuaia hnathawhte tha taka kalpui a nih theih nan inkaihhruaina hnuaiah Chief Minister remtihna in kumin March thla khan PMJVK Project vila enzuitu tur, Project Monitoring Unit din a nih thu a sawi a, PMJVK-a Project thehluh thinte chu Department-te hriatpui lem loha thehluh a awm nual a, hei hian harsatna a thlen nasat avangin Project Monitoring Unit chu din a ni, a ti.

Tun dinhmunah DC&MA Department-in Consultancy Firm inremna thuthlung ziahpui a nei loh thu pawh Minister chuan sawiin, sawrkar hmasaah NECS nen Project siam tura inremna thuthlung siam a ni a, hei hi nikum March ni 15 khan tihtawp dil a nih angin tihtawp a ni a, hemi hnu hian Consultancy dangte nen Project siam tura inremna siam a ni ta lo tih a sawi a. PMJVK chu Mizoram tana sum hnar pawimawh tak a ni a, hmasawnna ruhrel dinna pawimawh tak a nih avangin Mizoram sawrkarin tangkai zawka hman chhoh zel a tum thu leh State sawrkar chuan zaa 10 a tum ve tur chu pek chhoh zel a tum thu a sawi bawk a ni.

Nimin-a Assembly thutkhawm-ah hian House Leader leh Finance Department changtu Chief Minister Lalduhoma chuan PMJVK kaltlanga tun sawrkara sum la dawn loh chhan chu sawrkar hmasa huna hna inpek thawh zawh loh tam lutuk vang a ni tih a sawi a. Hachhek Bialtu MLA Robert Romawia Royte chuan State sawrkar in sum a hmuh sa a release loh vang niin a sawi thung a ni.