Sawrkar sum bawm-a chhunluh tam ber kum thleng

Directorate of Geology & Mining (DGM) chuan sawrkar kum kalta chhung khan sawrkar sum bawm-ah Rs.12,54,91,153/- chhunglutin hei hi kum khat chhunga an chhunluh tam ber tum a ni.

Nimin khan Aizawl-a Secretariat Conference Hall-ah State Geological Programming Board (SGPB) thutkhawm vawi 29-na neih a ni a, he hunah hian kum kalta 2023-2024 chhunga Directorate of Geology & Mining (DGM) leh Geological Survey of India (GSI) [Tripura-Mizoram Circle] hnathawh hrang hrangte tarlan a ni a. Sawrkar kum liamta 2023-24 chhung khan Directorate of Geology & Mining (DGM) chuan sawrkar sum bawmah Minor Minerals (lung, balu etc) atangin Non-Tax Revenue Rs. 11,25,69,183 an chhunglut a, Petroleum Exploration Licence (PEL), Fee atanga an hmuh Rs. 1,24,99,890/- leh Laboratory Testing Fee Rs. 4,22,080/- chhunglut bawkin a vaiin Rs.12,54,91,153/- chu Mizoram Sawrkar sum bawmah an chhunglut a. He hi Geology & Mining-in Mizoram sum bawm a sum chhunluh tam ber tum a la ni a. Hetihlai hian DGM chhungah Mizoram pum enkawltu thawktu nghet chu 48 an niin Sanctioned post chu 86 a ni.

Kum 2023-24 chhung hian Directorate of Geology & Mining (DGM) hman tur Dan thar pahnih (2) : The Mizoram Minor Minerals [Concession & Prevention of Illegal Mining], Rules 2023 leh The District Mineral Foundation Rules of Mizoram, 2023 te chu Mizoram Legislative Assemby-ah August 22, 2023 khan lay a ni a, Mizoram Gazette Notification-ah October 4, 2023-ah chhuah niin hman mek a ni a. Nimin-a thutkhawm ah hian Directorate of Geology & Mining (DGM) buatsaih Annual Report 2023-2024 chu tlangzarh a ni bawk.