Sawhthing hralhna ah Grade siam a ni dawn lo; Sawhthing tâm vangin harsatna a thleng mek thung

Chief Minister Lalduhoma chuan Sawhthing lei leh hralh chungchangah Grade A leh B a awm loh tur thu a sawi a. Hetihlai hian kumin hian Sawhthing a tâm nasa hle nia hriat a ni a, tun thlengin Mizoram-a khaw 263-a Sawhthing chingtu chhungkaw 6586 te Sawhthing chu a tâm tawh nia hriat a ni.

ZPM General Hqrs. a General Secretary te chuan niminpiah tlai khan Chief Minister Lalduhoma hi a Pisa-ah hmuin Sawhthing Grade A leh B siam tumna chungchang an sawipui a, he hunah hian Chief Minister chuan ruahmanna hmasa ah chuan Sawhthing lei leh hralh chungchangah Grade A leh B siam tumna a awm thu sawiin, tunhma lamin Sawhthing hralh chungchangah rilru pamham pu tawk lo awmin thenkhatin lei kai tifai mang lo leh a buk rih theih nan tui lo leih huh duh tawkte an awm thin thu a sawi a, “Hei hian insumdawn tawnnaah harsatna a siam thin tih kan hria a, kan sumdawnpuite nen thawhhona tha leh tlo kan neih theih nan he ruahmanna hi siam a ni,” a ti a. Amaherawh chu mipui lamin Sawrkar ruahmanna hi an hriatthiam chiah loh avang leh kuthnathawktute rilru a hnual ang tih hlauin he ruahmana hi mipui hriatthiam zawnga herrem a ni tih sawiin, “Grade A leh B a awm dawn lo a ni,” a ti a. Hetihlai hian Sawhthing chingtuten an hralh dawn hunah an Sawhthing chu a fai tha hle tur a ni a, rilru pamham pu leh hlawk tum lutukna avanga insumdawn tawn nana him lo thil lo ti an awm a nih chuan, a hralhna kawnga harsatna an tawk a nih pawhin sawrkawin mawh a phur dawn lo a ni,” a ti bawk.

Chief Minister chuan Thlai thar lei chu Sawrkar Flagship pawimawh ber a ni tih sawiin, “Inthlan hma atanga mipui hnena kan lo aupui tawh a ni a, kan rama kuthnathawhtute khaichhuhana tura hmalakna pawimawh tak a ni a, Pathian pawhin mal a sawm ngei kan beisei a ni,” a ti a. “Mipui kan ti beidawng thiang lova, kan ruahmanna a hlawhtlin theih nan helama mawhphurtu ten ngawrh takin hna an thawk mek a ni. Tlaithar lei leh hralh chungchangah hian hnamdang ten Mizote chu hnam rinawm leh sumdawnpui tlakah min ngaise kan duh a, tunhma thil avanga mipui rilru puthmang lo kal dik tawhlo te pawh siamthat kan in beisei a ni,” a ti a. ZPM chu mipui Sawrkar an nih angin thil tha turah chuan mipui aw an ngaithla zel dawn tih pawh sawiin, “A tul hunah chuan huaisen takin kan thu ah kan ding tlat thung dawn a ni,” a ti bawk.

Kumin hian Zoram pumah Sawhthing ching an tamin tunhnaiah Zoram hmun hrang hrang atangin Sawhthing tâm sawi a tam hle a. Hei vang hian Horticulture Department chuan hma la nghalin District tina DHO te'n report an thehlut ah tun thlenga report chinah khaw 263-a Sawhthing chingtu chhungkaw 6586 te Sawhthing a tâm tawh a. Hei vang hian Horticulture Department chuan Sawhthing tâm leh natna ven dan leh enkawl dan zirin ‘Training of Trainers for Operation Ginger’ chu nimin khan Horticulture Department a Officer te leh Field Staff te tan Aizawl-ah an buatsaih a ni.

Ruahman lawk ang chuan naktip, August 16, 2024 hian Sawhthing tâm beihpuithlakna ‘Operation Ginger - Fehchhuah Runpui’ chu neih tur niin Aizawl-a Directorate of Horticulture Office atangin Horticulture Minister Prof. Lalnilawma chuan a vailiam dawn a. Thawktute'n District tin tuamin an fehchhuak anga, hemi atan hian Sawhthing natna te, a bawmtu rannungte leh a enkawl dan lehkhabu te siam nghal niin a enkawlna dam-dawi te pawh theih ang anga ngaihtuah mek zel a, Sawhthing chinna hmun te pawh an tlawh tawh bawk a ni.

Horticulture Department chuan Sawhthing chingtute chu lo beidawng mai lo tur leh mithiamte thurawn anga an Sawhthing hmunte chu tha thlah lova lo enkawl zel turin an chah bawk a ni.