Mamit District-a Ration Card paih sak te harsatna chinfel a ni dawn tih Minister in a sawi

Food, Civil Supplies & Consumer Affairs (FCSCA) Minister B. Lalchhanzova chuan Mamit District chhunga Ration Card ziahluh theihloh 85 te chu an ngaihsak a, an harsatna chinfel a nih tur thu a sawi.

Supply Minister B. Lalchhanzova hian niminpiah tlai khan a Pisa-ah thuthar thehdarhtute kawmin Mamit District chhung Zomuantlang, Jampui leh Phuldungsei khuaa Mizoram khua leh tui mi 85-te Ration Card-a link zui theih loh awm mekte chu Mizoram Sawrkar chuan a ngai pawimawh hle tih a sawi a, “Heng zingah hian chhungkaw 50 leh chhungkaw pum ni lo mi 35 an tel. Heng mi 85-te hi Mizoram Sawrkar chuan kan mi leh sate an nih avangin Manual-in Ration Card kan siam sak dawn. Anni ho hian Tripura lama Ration Card an neih hi an surrender mai hi a tha kan ti. Mizoram Sawrkar chuan ramri-a awm kan mite hi kan ngaihsakin, an mamawhna ah a tuamhlawm chho zel dawn,” a ti bawk.

Ration Card link zui theih loh a nih chhan sawifiahin FCS&CA Minister chuan, “A hma chuan ramri-a awm thenkhatte hian State pahnihah hian Ration Card nei kawpin Aadhar pawh an nei kawp thei. Mizoram Sawrkarin Ration Card double-te a zawnchhuah chak em avangin tuna kan hmanraw hman Ration Card Management System (RCMS) database hian Ration Card nei kawpte hi a zawnchhuah tak avang hian Tripura-a Adhaar link telte kha Mizoram database in a chhinchhiah thei ta lo a ni,” tiin he harsatna hi a thlen dan a sawi a ni.

FCS&CA Minister chuan Tripura-a Ration Card leh Family Member System-in a accept theih lohte hi Mizoram lama an awm leh duh a nih chuan engtiklai pawhin Ration Card issue sak theih reng an nih thu sawiin, “Amaherawhchu, RCMS Portal-in hmun hnih ah Ration Card neih a phal loh avangin Tripura-a an Ration Card awmna atangin an in paih phawt a ngai ve dawn a ni,” a ti bawk.

Hetihlai hian MZP General Hqrs. hruaitute chuan niminpiah tlai khan Supply Minister B. Lalchhanzova hi a Pisa-ah hmuin heng Ration Card paih te chungchang hi an sawipui leh a. Hemi hmalam hian MZP hruaitute hian Phuldungsei mipuite Ration Card upgrade avanga an buaina chungchangah Supply Minister hi an lo hmu tawh a. Phuldungsei mipui ten Mizoram atanga ration buhfai an dawn ngei theih nan chak taka hmalaa, a theih dan kawng dap tûrin a ngen nawn a. Minister chuan hma an lak thu leh, chinfel vat a nih tur thu a lo sawi.