Employees’ State Insurance (ESI) Act chak taka kalpui theih nan thutkhawm neih a ni

Ministry of Labour & Employment hnuaia Employees’ State Insurance (ESI) Act chu Mizoram-ah chak zawka kalpui a nih theih nan nimin khan State Insurance Corporation Regional Board Mizoram chu a vawi khatna atan an thukhawm.

He thutkhawm SAD Conference Hall-I a neih hi Labour, Employment, Skill Development and Entrepreneurship Department changtu Minister Lalnghinglova Hmar chuan kaihruaiin Employees’ State Insurance Corporation hnuaia Private Institution hrang hranga thawktute tana hamthatna tha tak tak ruahmanna awm chu a taka hmang tangkaitu nih theuh tum turin kalkhawmte chu a chah a, ESIC hnuaia kan mi chhawrte tana hamthatna awm thei te a sawi bawk.

He hunah hian Robert Guite, Regional Director, ESIC, NER leh Dr. Richita Biswas, Medical Commissioner-East and North East Zone te chuan Mizoram a hmalakna kalpui tawh dan leh hmachhawp te tarlangin, ESIC hi Aizawl-ah kalpui mek a ni a, kum 2022-23 chhung khan mi 1960 an inziaklutin tun thleng hian mi 2634 an inziaklut tawh a. India ram pumah ESIC hian Hospital 161, Dispensary 1574, Medical College 13 a thawhpui mek bawk a, Insured Person (IP) fate tan ESIC Medical College 6-ah Seat reservation a awm thu tarlan a ni bawk.

Employees' State Insurance Corporation (ESIC) hi Ministry of Labour & Employment, Govt. of India hnuaia Statutory Body niin hnathawktute ESI Act 1948 in a huam te chu damloh leh bawrhsawmna (Sickness) avangte, nau neih (Maternity) avangte emaw, hnathawhna a inhliam avangte, hnathawkna hmun a chetsualna avanga ramtuileilo a awmte (Disablement) leh hnathawhna avanga nunna chan chhungte (Dependent) harsatna chhawmdawl leh tanpuina tur ruahmanna hrang hrang a keng tel a ni.

He Scheme hian eng sumdawnna pawh (Road Transport, Hotels & Restaurants, Cinemas, Newspaper, Shop, Educational/Medical Institution etc.) hnathawktu 10 (sawm) emaw, a aia tam emaw awmna te a huam vek a. Hnathawktu thlakhat a Rs. 21,000/- leh a aia tlem hlawhte tan he hamthatna hi dawn theih a ni a. ESI Act hnuaia hamthatna chang tur hian inziahluh hnuah hnathawktu in a hlawh atanga za zela 0.75 leh a chhawrtuin za zela 3.25 thlatin an chhunluh ve a ngai thung a ni.

ESI Act chungchang hrechiang duh te tan David Lalfakzuala, Assistant Director, Office Landline No. 0389-2913623-ah emaw, Mobile No. 9999573504-ah emaw zawhfiah theih a ni tih sawkar thuchhuah chuan a tarlang bawk.