RGSA kaltlangin VC 6 te Computer Set hlan an ni

South Tuipui Bialtu MLA Jeje Lalpekhlua chuan Inrinni khan Hnahthial-a MLA Office-ah Rashtriya Gram Swaraj Abhiyan (RGSA) Scheme kaltlangin Hnahthial District chhunga Village Council paruk te hnenah Computer Set a hlan.

A bial chhung Hnahthial-a hun hmang mek Jeje Lalpekhlua chuan VC te hnenah Computer set an hlan chu RGSA Scheme hnuaia Local Administration Department kaltlanga hlan a nih thu sawiin, fimkhur tak leh uluk taka enkawl tur leh an hmanraw dawn te chu VC ten khawtlang mipui rawngbawl nana tangkai thei ang bera hmang turin a chah nghal bawk a ni.

Hnahthial District chhunga Village Council Computer set hlante hi Cherhlun, Hnahthial South-III, Lungpuitlang, Tuipui 'D', South Vanlaiphai leh Khawhri VC te an ni a. Hei bakah hian MLA Fund hmanga a lei Green Board pahnih chu Ngharchhip Primary School hnena a hlan bakah Hnahthial District Teble Tennis Association hnenah Table Tennis Board a hlan bawk a ni.