Mizo hming hawha sumdawnna tihtawp an phut

Mizoram Business Coordination Committee (MBCC) chuan Mizoram-ah hnamdang, Mizo hming hawha dawr nei leh sumdawngte a rang thei ang bera titawp tura an phut thu an sawi.

Mizoram Business Coordination Committee (MBCC) chuan Zirtawpni khan thutkhawm neiin hemi hnua thuchhuah an siamah tunlai hian Mizoram-ah hnamdang dan lova sumdawng an tam leh hle tih an hriat thu an sawi a, Mizo hming hawha hnamdang dawr leh Mizo hminga hnamdang Motor register awm zawng zawngte chu dan anga hrem an nih theih nan hmalak an tum thu sawiin, Mizo hming hman tirtu zawng zawngte a rang thei ang bera titawp nghal tura an ngen thu leh a tiluite chu dan anga hma an la anih pawhin, mahni hnam hralha mahni hming hnamdang hman tirtute mawh a ni dawn tih hre turin an ngen tih an sawi a ni.

MBCC chuan Mizoram kawtchhuah Vairengte atanga Sairang Four Lane siam turah Contractor-in hnathawk turin hmanrua an inchhawp tawh a, engemaw rokhawlhna avanga an thawh mai theih loh avangin Sawrkar hnenah hnathawhna tur hmanraw dah man cheng nuai 7200 chawi tura a phut chu pawi an tih thu leh hemi chungchang hi sawrkar in chingfel thuai se an duh thu an sawi a. Hei bakah hian Mizoram-a sumdawng engemawzat ten Income Tax pe tura tihna lehkha an dawn chungchangah sawrkar lam leh dan hre mite nen zirchianna zau zawk nei turin an inbuatsaih mek tih an sawi a, lo chi-ai lo turin an member te an ngen bakah hetiang lama harsatna neite chuan MBCC hruaitute hrilh hre nghal vat thin turin an ngen a ni.