Phullen-ah Chalfilh bial MLA Office hawng

Chalfilh bialtu MLA leh Assembly Speaker Lalbiakzama chuan Inrinni khan Phullen-ah Chalfilh bial MLA Office a hawng.

Phullen-a MLA Office hawnna ah hian Speaker Lalbiakzama chuan MLA chuh tura a rilru a buatsaih tan atanga a duhthusam pakhat, Bial chhunga MLA Pisa dah a tihlawhtling thei chu lawmawm a tih thu a sawi a, amah vote tu mipuite chu a hlawhtlinna tura pawimawh tak an nih thu a sawi bawk. MLA Pisa chu bial mipuite ta a ni tih sawiin, mipuite avanga he Pisa hi piang thei chauh a ni tih a sawi a, Chalfilh Bial Pisa pui nihna phurchhuak tur khawpa a lo tangkai theihna turin tanrual puiah mipuite chu a sawm nghal a ni.

Mizoram sawrkar thar chu mipui sawrkar a nih angin MLA zawng zawngte mahni Bial-ah a tam thei ang bera awm tura beisei an nih bakah kawng tinrenga mipui banphak a inchhawp hnaih chu sawrkar rilru a ni tih Speaker chuan a sawi a, Bial chhunga MLA Pisa neih chu hemi kawnga an thil tum tihlawhtlingtu a nih theih thu a sawi a. Khawchhak chan lam, langa Aizawl dawr phaklohna huamchhunga hmun laili ber a nih avangin Phullen hi Bial MLA Pisa hmun atan an thlang tih sawiin, duhsak bik khua nei lovin bial mipuite tana tha ber tura an ngaih avanga he hmun hi thlang an ni tih a sawi bawk a. He Pisa hian Bial mipui ten Aizawl dawr tura an hun, tha leh sum tam tak an sen thin kha a sukiang dawn tih sawiin, he Pisa hi MLA chauh hman tur ni loin, Bial chhung mi ten Bial tana hnathawhna hmun ‘Bial mi te tana INPUI’ a ni dawn a ni tih a sawi bawk.

Chalfilh Bial chu Bial dangte tan pawha entawntlak ‘Model Constituency’ a siam a duh tih Assembly Speaker chuan sawiin, Central leh State sawrkar department hrang hrangte dawrin Project engemaw zat thehluh a ni tawh a, State Department sum piah lamah Central Scheme leh Project chi hrang hrang atanga sum hailuh tumin he Bial tan hian theihtawpin tan an la tih a sawi a, mipuite ruahmanna (proposal) thehluhte pawh a changtu Department lamah theihtawpin an nawrzui thin thu leh an hlawhtlin theih nan an beih zel tur thu a sawi bawk a ni.

MLA Local Area Development Scheme (MLA LADS) chu mi zawng zawng tana tangkai tur hmasawnna ruhrel (asset) inhmantawm theih tur thil dinna tur a ni tih Speaker chua a sawi a. Awmze neia kalpui turin ruahmanna fel tak duan a nih thu leh a hlawhtlinna tura pawimawh ber chu Bial mipuite an ni tih a sawi a, beiseina sang tak nei chungin a hlawhtlinna tura mawhphurhna mipuite kutah a hlan tih a sawi bawk.

Phullen-a Chalfilh Bial MLA Office hawnna hun hi Chalfilh Central Block President C. Lalremruata chuan kaihruaiin Pastor Lalbiaknunga chuan hunserh a hmang a, Office Report te ngaihthlak a nih bakah thusawi hrang hrang ngaihthlak niin Speaker leh amah tawiawmtu Offical te an tel bawk a ni.