Remna leh muanna tundin a pawimawh thu CM in a sawi

Chief Minister Lalduhoma chuan, “Kan ram leh hnam hian hmasawn zel kan duh anih chuan remna leh muanna kan tungding tlat tur a ni,” a ti.

Aizawl Young Men Christian Association in ‘World Peace Day, 2024’ lawmna nimin a I&PR Auditorium, Aizawl-a an neih a hmanmpuina ah Chief Minister Lalduhoma chuan khawvel history-ah indona chanchinin hmun a luah tam hle tih sawiin, “Bible kan chhiar pawhin indona thu a tam hle. Indona hi a lo irhchhuah chhan chu eng pawh ni se, a hmawr bawkna erawh chu dawhkan-ah inbiakna hmanga chinfel a ni deuh zel thin,” a ti a. “Indopui pahnihna pawh kha Treaty of Paris inremna ziak a ni a, Indopui pakhatna pawh Treaty of Versaille hmanga chinfel a ni. Hei hian ralthuam hmanga inbeihna in remna min thlen zo lo tih leh innghirnghona hi inbiakna hmanga chinfel theih a nihzia a tilang,” a ti a. “Buaina hmun ah hmasawnna a kal thei lova, kum 20 chhung rambuai kan tawrh tawh atangin chu chu kan hmu a ni. Kan ram leh hnam hian hmasawn zel kan duh anih chuan remna leh muanna kan tung-ding tlat tur a ni,” tiin kalkhawmte a chah a. “Chhungkua ah inremna ila, chhungkua atangin ram din ila, ram leh khawtlang nuam leh ralmuang kan din ngei ngei dawn a ni,” a ti bawk.

World Peace Day, 2024 lawmna hun hi Zonunsangi Ralte chuan kaihruaiin Aizawl YMCA President Dr. R. Lalthangliana, Regional Chairman, NE India Region pawhin thu a sawi a. Er. K. Lalsawmvela, Honorary General Secretary, Aizawl YMCA chuan World Peace Day an hman chhan leh an hman dan tlangpui a sawi ve bawk. UN chuan International Peace Day atan September ni 21 a hmang a, YMCA hian Indopui pahnih laia Hiroshimaa Atom Bomb thlak ni chu ‘World Peace Day’ atan hian an hmang ve thung a ni.