PWD in duh angin kawng an cheihnum thei lo tih sawi

PWD Minister Vanlalhlana chuan PWD in an enkawl kawng te chu duh anga an cheihnum theih rih loh thu a sawi.

Fur ruahtui tlain chhiatna a thlen chungchangah PWD Minister Vanlalhlana chuan kumin hian kum dang zawng aiin India ram pumah Fur ruahtui a tla tamin, State tin deuhthawin kan tuar nasa tih a sawi a. Mizoram pawhin tunhnai kum dang zawng aiin kan tuar nasa nia a lan thu leh hmun tam takah lei a min avangin kawngpuite leiminin a hnawh a, kawng thenkhat phei chu a bung/chhum hmawk thu leh hmun thenkhatah phei chuan In leh lo chhe ta vek te, nunna chan hial te an awm thu sawiin, pawi a tih thu a sawi a. Hetianga Khuarel chhiatna a lo thlen hian PWD chu a tuar nasa ber pawl Department an ni ziah tih sawiin, “Tun tum chhiatna ah pawh hian kan kawng enkawlte him aram a awm lo tluk a ni a. May ni 28-a Cyclone Remal-in min chhut atang khan kan kawngin chhiatna a tawk zawn chho mawlh mawlh mai a. Kawng thenkhat chu metre 100 dan lek leka ping tlat te awmin kawng thenkhat phei chu a kawng chhuat bal nasa tak te, bal hlawk, a thara kawng sial ngai te kan nei,” a ti a. Heng chhiatna hrang hrang siamtha leh tura PWD a thawktu hrang hrang ten theihtawp an chhuahna ah lawmthu a sawi bawk.

PWD Minister chuan kan sum dinhmun a that lutuk loh avangin sawrkar tan pawh a luhaithlak tih sawiin, PWD-in an enkawl lai kawngte pawh duh angin an cheihnum thei hrih lo tih lo hriatpui turin Zoram mipuite a ngen a. “Tunah hian leimin thenna ringawt pawh mi tam tak hnenah a vaibelchhe tel tehmeuh leiba kan nei a. Kan khawl hire-na te pawh dawhthei taka min lo nghak turin ka ngen a, Central leh State sawrkara Finance lam enkawltute pawh a bik taka kan harsatna min ngaihtuahsak turin ka ngen nghal bawk a ni,” a ti a. Kawngpui hmangtu mipuite pawh hna thawktute zai ngai a, zawldawh taka leimin thiantute tawiawm a, kawng tlang hun dawhthei taka nghak hram hram turin a ngen bawk.

Leimin then chu zan thim, kawng chung lam atanga lung lo lum thei leh thing lo tlu thei hmu chian theih loh ah chuan nunna chan hial pawh awm theih a nih thu PWD Minister chuan sawiin, “Hetiang taka fimkhur ngai a nih avang hian experience lo ngah tawh zawk Officer-te chuan a theih hram chuan zan thim hnuaia thawk lo turin field lama hna thawktute pawh an chah hlawm a, nunna chan leh hliampui tuar kan awm lo niin ka hria a, Pathian vennaah kan zavaia lawmthu sawi hi kan tih ngei pawh a tha awm e,” a ti a. Fur a la zo lo tih sawiin, “Kan cho reng vang nilovin chhiatna hrang hrang pawh lo thleng leh thei a ni a, PWD-a ka thawhpui zawng zawngte fimkhur tak leh Pathian venna leh enkawlna dil zel chungin taima leh thahnem ngai taka ram tana thawk turin ka ngen a, hetianga thawk thei tura hriselna nei turin duhsakna ka hlan bawk,” a ti a ni.