Ration Card var tana buhfai rate tihsan ah thu diklo hmanga MNF an puh niin sawi

Deputy Chief Minister hlui Tawnluia chuan Ration Card var tana Buhfai rate tihsan chungchang ah ZPM ten thudik lo hmanga MNF an puh nia sawiin, a ngaih thiamloh thu a sawi.

MNF Party in nimin-a Aizawl Mizo Hnam Run-a Chhung Inkhawm an neih ah MNF NCC leh Deputy Chief Minister hlui Tawnluia chuan Ration Card Var-a buhfai leina rate tihsan chu MNF sawrkar laiin Supply Department atanga rawtna chu Cabinet-in a ngaihtuahtu tur Sub-Committee a din thu sawiin, “Chairman-ah Dy. Chief Minister dah niin Vice Chairman-ah Supply Minister, Secretary-ah Supply Secretary, Member atan NGO aiawh te leh Consumer Affairs Committee aiawh leh sawrkar Official te ruat an ni,” a ti a. “Uluk taka ngaihtuah anih hnuin Committee hian tihpun turin recommend (rawtna) a siam lova, Cabinet-ah pawh report pek luh a la ni lova, Inthlan puan in a zui ta a nih kha, MNF hunlaiin tihpun loh in Vawiin ni thleng hian a kal a ni tih mi zawng zawng hriat a ni,” a ti a. ZPM Sawrkarin October 2024 atanga tihpun a tum avanga MNF an puhna chu thu belhchian dawllo a nih thu sawiin, “Khawiah nge MNF Sawrkarin buhfai rate tihpunna order a siam chu rawn lek chhuak rawh se. Keini chuan mipuite dinhmun zirchiang chung zelin Buhfai rate hi kan sawrkar chhungin kan tipung lo a ni,” a ti bawk.

Tunhnaia Ration Card paih sak Phuldungsei chungchang pawh sawiin Tawnluia chuan, “Phuldungsei (Zampui Tlangdung ) hi Mizoram State chhunga mi a ni a. MNF sawrkarin Ration Card kan pe a, Village Council pawh kan pe a ni. Ration Card Management System (RCMS) ah Verified & Approved vek an ni a. Heng Ration Card hi ZPM sawrkarin a paih (cancelled) hi hnam inpumkhatna atana pawi khawihna lian tak a ni,” a ti a. ZPM in Ration card an cancel chu MNF chuan an pawm thei lo tih sawiin, “Tripura in an State-a rin luh an tum hi kan lak let leh hma chu kan bei dawn a. Zoram hmun hrang hranga Zohnahthlak te Inzawmkhawm hi kan thupui pawimawh ber te zinga mi a ni a, keini MNF chuan 'Pathian leh kan ram tan' tih thupui vuan chungin Mizo Nationalism hi kan tung ding zel dawn a ni,” a ti bawk.