Home Minister in Police te tan la thar turin a beisei

Home Minister K. Sapdanga chuan ‘India ramah Mizoram Police an tha ber’ kan tih leh theihna tura tan la thar tura beisei an nih thu a sawi.

Home Minister K. Sapdanga hian nimin khan Lawngtlai Police Station leh 3rd IR Batallion Headquarters, Thingkah te tlawhin tun hma chuan Mizoram Police te chu India rama Police tha ber, thil chhuichhuah kawnga chhuan-awm an lo tih thin thu sawiin, “Engtik emaw lai atang khan mipuiten kan Police chhuanawm tak takte kan hmuh dan hi a dang ta deuh niin a langa, tan kan lak vat angai niin ka hria,” a ti a. “Sawrkar tharah chuan 'India ramah Mizoram Police an tha ber' kan tih leh theihna turin kan puan vente sawichhinga tan la thar leh turin ka beisei che u a ni,” a ti.

Home Minister chuan ZPM an sawrkar atangin tih tak zetin Police dinhmunte an zir thu sawiin, “Police indaihlohna te a tamin hmunhma te pawh lo tlabal a tam tawh hle a, kan sawrkar chhung a la rei lova, a theih ang angin thawmthat hna kan thawk nghal a, a pawp lai kan hnawh-phui zel dawn a ni. Kan awmna hmun chungchang ah chan chhe lai bik a awm chuang lova, hmun hla deuh inhremna anga kan ngai te hi a tha lo, sorkar hnathawk chu che reng kan ni tih hriain tumah vanneia vanduai bik kan awm lo tih hre thar leh ang u,” a ti bawk.

Home Minister chuan kan ram chu tihchhiat belh tlak a awm tawh lo nia sawiin, “Eiruk dona kawngah sawrkar thar kan tang chho hle a, sum leh pai chauh ni lo, kan hun hman dan nen lam hian eiruk theih a ni a, sawrkar hnathawk inthlahdah tak te hian eiruk bul kan tan a, sum leh pai duhamna ah kan lut fo thin. Chuvangin mahni invenna chang i hria ang u, Kalphung thar-ah kan lut ta bawk a, tute mah inthlahdah a thiang lo, Sawrkar tharah chuan a chhe lai siamthatu lo ni ang che u,” a ti bawk.