Rampum-ah Doctor ten lungawilohna an lantir

August 9, 2024-a RG Kar Medical College & Hospital, Kolkata-a Doctor zirlai hmeichhia pawngsual leh thah a nih duh loh entir nan Inrinni zing dar 6:00 atang khan India ram pumah darkar 24 chhung lungawi lohna lantir a ni a. Mizorama Doctor-te pawhin zawm vein emergency tih loh chu damdawi In leh Clinic-ah damlote an en lo a ni.

Indian Medical Association (IMA) chuan lungawi loh lantir chhung hian Mizoram a damdawi In (sawrkar, mimal leh Mission Hospital)-ah emergency services chauh hawngin OPD-ah Doctor an thu lo a, Aizawl-a damdawi In lian Civil Hospital chuan OPD case 40 bawr ve awmin Ward round pawh pangngaiin a kal a, Planned Operation lo chu zai tur an lak loh thu Doctor te chuan an sawi. ZMC-ah pawh Damdawi In a awm sa damlo leh emergency bak en an neih loh thu Doctor ten sawiin, Emergency in C Section 4 an zai a. Surgery-ah Emergency 2 leh Ortho lamah pakhat an neih bawk thu an sawi bawk. 

August ni 9-a RG Kar Medical College & Hospital, Kolkata-a Post Graduate zirlai hmeichhe pakhat rawng taka a duty-na hmuna pawngsual leh thah a nih duh loh leh demna lantir nan hian Zirtawpni zan khan Zoram Medical College Zirlaite chuan Bati nen kawng an zawh a. He Kawngzawh hi ZMC Students' Union kaihhruaina hnuaiah kalpui a ni a, ZMC zirlaite chuan an Doctor zirlaipui thihna tawrhpuina leh hriatrengna hun hmangin, a tuartu chhungte tan leh dik taka rorel a nih theih nan an tawngtai a, ZMC zirlai, Intern leh Faculty te chuan an Doctor thuam ha in he hun hi urhsun takin an hmang a ni.