State puma lei chhung tui hausakna humhalh leh hman dan mumal takin kalpui a ni dawn

PHE Minister Prof. Lalnilawma chuan Mizoram sawrkar thuchhuak angin Mizoram Ground Water Act, 2023 leh Rules 2024 dan hnuaiah Mizoram State Ground Water Authority (MGSA) din a nih thu sawiin, he Authority hian State puma lei chhung tui hausakna humhalh leh hman dan mumal takin a kalpui dawn tih a sawi.

Nimin-a a Pisa-a thuthar thehdarhtute a kawmna ah PHE Minister Prof. Lalnilawma chuan Mizoram Ground Water (Control & Regulation) Act, 2023 leh Rules 2024 hman tan a nih thu leh he Dan hnuaiah hian Mizoram State Ground Water Authority din niin he Authority hian State puma lei chhung tui hausakna humhalh leh hman dan mumal takin a kalpui dawn tih a sawi a. He Dan hnuaiah hian Lei chhung tui lachhuaka hman tum (mahni hman tur, sumdawnna, lo neihna leh industry atana hman tur emaw pawh nise) reng reng te chuan Mizoram State Ground Water Authority (MSGA) hnenah Form awmsa hmangin dilna an thehlut tur a ni a, phalna pekte chauhvin lei verhin lei chhung tui an hmang thei dawn a. Lei chhung tui lachhuaka hmang mek leh leiverhna khawl (drilling rig leh a dang) nei reng reng chuan (Mizoram State Ground Water Authority (MGSA)-ah dilna form awmsa thehlutin an inziaklut vek tur a ni tih a sawi bawk.

PHE Minister chuan he Dan hnuaiah hian Lei chhung tui tam tawklohna hmun atanga tui lak chhuah khapna dan siam a nih thu leh Dan hian tui humhalh a ngai pawimawh thu sawiin, ruahtui khawl leh lo neihna atana tui hman dan tha zawk neih te a ngai pawimawh hle tih a sawi a. He Dan bawhchhia a phalna nei lo a hma la lui emaw, khawl register loh hmanga leiverhte chu hrem an nih tur thu pawh sawiin, “Kan Lei chhung tui awmte humhalh a, tangkai taka kan hman tlan theihna tur dan siam hi zawm vek turin mi zawng zawng kan ngen a ni,” a ti a. Chiang zawka hre duh tan PHE website www.phed.mizoram.gov.in-ah en theih a nih bakah Mizoram State Ground Water Authority Office ( E-in-C, PHED Office-ah) zawhfiah theih a nih thu a sawi bawk.

Mizoram Ground Water (Control and Regulation) Act hi kum 2023 khan pawm a lo ni tawh thu pawh PHE Minister chuan sawiin, he Dan hnuaiah hian Tui siak chhuaktuten tui litre 10,000 zelah Chhiah cheng khat (Re. 1) pek tur a nih thu leh Irrigation atan nikhat-a 10Cum aia tamlo a nihin chhiah hi awl theih a nih thu a sawi a. Chhiah hmun li a then a hmun khat (1/4) chu State sawrkar-ah kalin Chhiah hmun li a then a hmun thum (3/4) chu Mizoram Ground Water Authority Fund-ah a kal ang tih a sawi a, a tul ang VC/LC hnenah leichhung tui tih changtlun nan a pe thei ang tih a sawi bawk.

Lei chhung tui (ground water) hi ram leilung hausakna pawimawh tak mai a nih thu pawh Prof. lalnilawma chuan sawiin, Rualkhai zawk leh awmze neia mipuiten kan hman tlan theih nan te, siak chhuah tam lutukin lei tlahniam a thlen theih avang te leh tui hna dang a tih kang theih avang te in dan mumal tak hi siam a nih thu a sawi a. Dan in a phut anga ti lova leichhung tui chungchanga hmalatu reng reng chu hrem leh chawitir tur a ni tih sawiin, “In khuahkhirhna leh inhremna lam chauh ni lovin he dan hnuaiah hian hna tangkai tak tak thawh a ni ang. Leichhung tui leh tuihna tih changtlun leh lei chhung tui phai tawh hnawhkhah leh lamah te, in zirtirna leh thiam thila thurawn inpekna lamah pawh he danah hian a awm vek a, helamah pawh hian chak taka hmalak tum a ni,” a ti.

Mizoram Ground Water Authority thupek avanga lungawilote chuan thubuai an thehluh theih thu leh thupek chhuah atanga ni 60 chhungin Form 11 hmanga thehluh tur a nih thu leh Fee Rs. 200 pek a ngaih thu te a sawi bawk a ni.